Jinoyat ishlari bo‘yicha Mirobod tuman sudida Straus House MChJ ta’sischisi va mas’ul rahbarlariga nisbatan o‘tkazilgan sud jarayonlari yakuniga yetdi. Bu haqda Oliy sud matbuot xizmati xabar berdi.
Ma’lum qilinishicha, I.Isroilov (Straus House MChJ ta’sischisi, 1993-yilda Toshkent shahrida tug‘ilgan), A.Mahmudaliyev (Straus House MChJ direktori, 1995-yilda Toshkent viloyatida tug‘ilgan), D.Qutpiddinov (Straus House direktori o‘rinbosari, 1994-yilda Toshkent viloyatida tug‘ilgan) va O.Saidov (Straus House bosh hisobchisi, 1961-yilda Toshkent shahrida tug‘ilgan) ga nisbatan jinoyat ishini ko‘rib chiqish bo‘yicha sud jarayoni nihoyasiga yetgan va sud hukmi e’lon qilingan.
Ushbu jinoiy ish jinoyat ishlari bo‘yicha Mirobod tuman sudi sudyasi O.Ilhomjonov raisligida ko‘rib chiqilgan.
E’lon qilingan sud hukmiga ko‘ra, I. Isroilov Jinoyat kodeksining 238-moddasi (Yolg‘on guvohlik berish) 3-qismining “a” bandi bilan oqlanib, Jinoyat kodeksining 168-moddasi (Firibgarlik) 4-qismining “a”, “v” bandlari, 184-moddasi (Soliqlar yoki boshqa majburiy to‘lovlarni to‘lashdan bo‘yin tovlash) ning 3-qismi, 189-moddasi (Savdo yoki xizmat ko‘rsatish qoidalarini buzish) ning 1-qismi, 243-moddasi (Jinoiy faoliyatdan olingan daromadlarni legallashtirish) va 227-moddasi (Hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish) 2-qismining “a” bandida nazarda tutilgan jinoyatlarni sodir etganlikda aybli deb topildi. Unga uzil-kesil o‘tash uchun 9 yil muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyalarda o‘tash belgilandi.
A.Mahmudaliyev Jinoyat kodeksining 168-moddasi 4-qismining “a”, “v” bandlari, 184-moddasining 3-qismi, 189-moddasining 1-qismi va 227-moddasi 2-qismining “a” bandida nazarda tutilgan jinoyatlarni sodir etganlikda aybli deb topilib, unga uzil-kesil o‘tash uchun 7 yil muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyalarda o‘tash belgilandi.
D.Qutpiddinov Jinoyat kodeksining 168-moddasi 4-qismining “a”, “v” bandlari, 184-moddasining 3-qismi, 189-moddasining 1-qismi va 227-moddasi 2-qismining “a” bandida nazarda tutilgan jinoyatlarni sodir etganlikda aybli deb topilib, unga uzil-kesil o‘tash uchun 8 yil-u 5 oy 26 kun muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyalarda o‘tash belgilandi.
O.Saidov Jinoyat kodeksining 168-moddasi 4-qismining “a”, “v” bandlari, 184-moddasining 3-qismi, 189-moddasining 1-qismi va 227-moddasi 2-qismining “a” bandida nazarda tutilgan jinoyatlarni sodir etganlikda aybli deb topilib, unga uzil-kesil o‘tash uchun 5 yil muddatga ozodlikni cheklash jazosi tayinlandi.
Jinoyat ishi yuzasidan xatlangan mol-mulk tegishli tartibda jabrlanuvchilarga nisbatan yetkazilgan zararlar o‘rnini proporsional tartibda qoplash uchun qaratilishi, sudlanuvchilar I.Isroilov, A. Mahmudaliyev, D.Qutpiddinov va O.Saidovdan solidar tartibda tegishli tartibda davlat foydasiga 222 386 043 so‘m undirilishi belgilandi.
I.Isroilovdan “E’zoz maxs” va “CFS max” MChJlarning faoliyati yuzasidan jabrlanuvchilarga yetkazilgan moddiy zarar undiriladi.
I.Isroilov, A.Mahmudaliyev, D.Qutpiddinov va O.Saidovdan solidar tartibda Straus House MChJning faoliyati yuzasidan jabrlanuvchilar foydasiga yetkazilgan moddiy zarar miqdori undirilishi belgilandi.
“Jinoyat ishi yuzasidan IIV huzuridagi Tergov departamentining ATIB “Ipoteka bank” Mehnat filiali hisob raqamida saqlanayotgan hamda xatlangan Pokistonning Chemikals & Marbels Lahore Pakistan kompaniyasiga tuyaqush jo‘jalarini sotib olish maqsadida shartnomaga asosan ko‘chirilgan 1 854 000 000 so‘m miqdoridagi pullar tegishli tartibda yetkazilgan moddiy zararlarni qoplashga proporsional tartibda qaratilishi belgilandi”, — deyiladi xabarda.
Mazkur jinoiy ish bo‘yicha sudga raislik qiluvchi tomonidan sudlanuvchilarga va boshqa tomonlarga hukm ustidan shikoyat qilish tartibi va muddati tushuntirilgan.
Fevral oyida Straus House jabrlanuvchilari tergov tugaganiga qaramay, sud boshlanmayotganidan norozi bo‘lib, hukumatdan yordam so‘rab Vazirlar Mahkamasi oldida to‘plangan edi. Ungacha, Ichki ishlar vazirligi Straus House’dan jabrlanganlarni hududlardagi tergov bo‘limlariga murojaat qilishga chaqirgan.
Eslatib o‘tamiz, MChJ mansabdorlari jami 16,1 milliard so‘m miqdordagi to‘lovlarni jamiyatning bankdagi hisob raqami orqali qabul qilgan. Ammo belgilangan muddatda umumiy 319 nafar shaxsga tuyaqush jo‘jalarini yetkazib bermasdan 7,2 milliard so‘mni o‘z ehtiyojlariga sarflab yuborgan.
Izoh (0)