Toshkent shahrida onlayn moliyaviy piramida tashkil qilgan shaxs ushlandi. Bu haqda Ichki ishlar vazirligi axborot xizmati xabar berdi.
Qayd etilishicha, Yakkasaroy tumanida yashovchi 31 yoshli K.M. Telegram’da “Hadya berib hadya oling” nomli guruhga a’zo bo‘lib, guruhdagi “pullarni 2 barobar ko‘paytirib beramiz” mazmunidagi xabarlarga ishongan holda 28 million so‘m pulini noma’lum shaxs plastik kartasiga o‘tkazib berganini ma’lum qilgan.
O‘tkazilgan tezkor-qidiruv tadbirlari natijasida, ushbu jinoyat Navoiy viloyati Karmana tumanida yashovchi 29 yoshli X.D. tomonidan sodir etilgani aniqlandi. Jinoyat sodir etgan X.D. O‘zbekiston Respublikasi Jinoyat kodeksining 188 prim 1-moddasi 2-qismi bilan jinoiy javobgarlikka tortildi. Qonunga muvofiq, X.D. tomonidan sodir etilgan jinoiy harakatlar uchun 5 yildan 7 yilgacha ozodlikdan mahrum qilish jazosi nazarda tutilgan.
Izoh (0)