Ўзбекистон Ички ишлар вазирлиги бизнес-тренер Ислом Иброҳимовни қидирувга берди. Унга оид маълумотлар идора сайтига жойлаштирилган.
Қайд этилишича, Иброҳимов Жиноят кодексининг 168-модда (фирибгарлик) 4-қисми, “а” банди билан айбланмоқда. Ушбу модда билан айбдор деб топилганлар БҲМнинг 600 бараваригача жаримага тортилиши ёки 10 йилгача озодликдан маҳрум этилиши мумкин.
Ислом Иброҳимов 1996 йили Бухоро вилояти Шофиркон туманида туғилган. 2021 йилда “Ёшлар” телеканалининг Сtart up club лойиҳасига берган интервьюсида у ўрта махсус таълимни Тошкент шаҳридаги Юридик коллежида олгани, актёр бўлиш мақсадида Консерваторияга топшириб, кира олмагани ҳақида сўзлаб берган.
2022 йилда Ислом Иброҳимов тадбиркорликни ўргатадиган Business Invest бизнес-марказини очганди. Шунингдек, у YouTube’даги мотивацион роликлари билан танилган. Шу каби видеоларининг бирида у бир ойда 10 минг доллар топиш йўлини ўргатган. Унинг усули ва йўналиши ижтимоий тармоқларда кўп бора танқид қилиниб, кулгига олинганди.
2022 йилда блогерлар, хусусан, “Субъектив” лойиҳаси муаллифлари Ўзбекистонда “бизнес-тренинг” номи билан курслар сотаётганини, улар орасида ўзи ҳақида ёлғон маълумот тарқатиш орқали кўпроқ мижоз йиғаётганлар ҳақида сўз юритиб, Ислом Иброҳимов масаласига алоҳида тўхталиб ўтганди.
“Дарё” бизнес-тренер Ислом Иброҳимовнинг қидирувга берилишига ўша пайтда кўрсатилган фактлар сабаб бўлганми ёки бошқа фирибгарлик масаласида гумонланаяптими деган саволларга жавоб топиш мақсадида бу масалада Ички ишлар вазирлиги ахборот хизмати раҳбари Шоҳрух Ғиёсов билан боғланди. Масъул ҳозирча бошқа маълумот бера олмаслигини маълум қилди.
Изоҳ (0)