“Olmaliq kon-metallurgiya kombinati” “Qolmaqir” konida ko‘p yillar mehnat qilgan ekskavator mashinisti, mehnat faxriysi, O‘zbekiston Qahramoni Jonsaid Turdiyev 20-oktyabrda 69 yoshida vafot etdi. Bu haqda Toshkent viloyati hokimligi matbuot xizmati xabar berdi. Shavkat Mirziyoyev uning vafoti munosabati bilan hamdardlik bildirdi.
Jonsaid Turdiyev 1954-yil 20-iyun kuni Toshkent viloyatining Bo‘ka tumanida tug‘ilgan. O‘rta maktabni tugatib, harbiy xizmatni o‘tagach, Toshkent viloyati, Olmaliq shahridagi 80-avtokorxonada haydovchi bo‘lib ish boshlagan. 1977-yildan mehnat faoliyatini Olmaliq kon-metallurgiya kombinati tizimida davom ettirib, qariyb o‘ttiz yil mobaynida “Qolmaqir” konida samarali xizmat qildi, ko‘plab shogirdlar tayyorlab, O‘zbekiston tog‘-kon sanoati rivojiga katta hissa qo‘shdi.
U jamoatchilik ishlarida faol ishtirok etib, Olmaliq shahar “Ma’rifat” targ‘ibotchilar jamiyati a’zosi, faol targ‘ibotchi sifatida hududda islohotlarni amalga oshirish, aholini ijtimoiy himoya qilish, turli millat vakillari o‘rtasida do‘stlik va hamjihatlikni mustahkamlashda jonbozlik ko‘rsatgan.
Jonsaid Turdiyevning davlat va xalq oldidagi xizmatlari yuksak e’tirof etilib, u 1998-yilda “O‘zbekiston Qahramoni” oliy unvoni hamda “Oltin yulduz” medali bilan mukofotlangan.
“Mamlakatimiz kon-metallurgiya sohasining taniqli vakili, samimiy va kamtarin inson Jonsaid Turdiyevning xotirasi qalblarimizda hamisha saqlanib qoladi”, — deyiladi ta’ziyada.
Izoh (0)