O‘zbekiston Qahramoni, “Nurli obod” fermer xo‘jaligi rahbari Lola Murotova 64 yoshida vafot etdi, deya xabar bermoqda O‘zA.
Avvalroq prezident matbuot kotibi Sherzod Asadov Lola Murotova betob bo‘lib qolganini, Shavkat Mirziyoyevning topshirig‘iga ko‘ra, bosh vazir o‘rinbosari Shuhrat G‘aniyev, sog‘liqni saqlash vaziri Behzod Musayev, prezident maslahatchisi o‘rinbosari A.Jo‘rabayev bilan birgalikda viloyat shoshilinch tibbiy yordam markazida davolanayotgan O‘zbekiston Qahramoni holidan xabar olinganini ma’lum qilgandi.
Farg‘onaga tashrifi davomida Shavkat Mirziyoyev Lola Murotovaning betobligi haqida ham to‘xtalib o‘tgandi.
“Kecha kechqurun bir masala meni qiynadi. Lola opa bugun zalda o‘tirishlari kerak edi. Ammo betob bo‘lib qolibdilar. O‘zim borib ko‘rib kelay desam, shifokorlar bemorni bezovta qilmaslik kerakligini aytishdi. Ko‘nglim juda g‘ash bo‘ldi. Ko‘p shifokorlarni yubordim. Yaratgandan iltijo qilamiz, tez kunlarda sog‘ayib ketib, safimizga qaytsinlar”, — degandi prezident.
Ma’lumot uchun, Lola Murotova 1958-yilda Farg‘ona viloyatining Oltiariq tumanida tug‘ilgan. 2019-yilda prezident farmoni bilan unga O‘zbekiston Qahramoni unvoni berilib, oliy nishon — “Oltin yulduz” medali topshirilgandi.
Izoh (0)