Ayni paytda Shavkat Mirziyoyev raisligida suv muammosiga bag‘ishlangan videoselektor yig‘ilishi bo‘lib o‘tmoqda. Bu haqda prezident matbuot kotibi Sherzod Asadov ma’lum qildi.
Qayd etilishicha, so‘nggi ikki yilda suv xo‘jaligiga, jumladan, suv tejovchi texnologiyalarga katta miqdorda subsidiya ajratilgan. Lekin o‘tgan yili isteʼmol qilingan 39 milliard kub metr suvning 36 foizi tuproq o‘zanli kanal va ariqlarda yo‘qolgan.
Bundan tashqari, yerlarning 70 foizi eski usulda sug‘orilgani bois 5-6 milliard kub metr suv behuda sarflanib, kollektorlarga tashlanayotgani aytildi. Bugungi kunda 2,5 million gektar maydonni sug‘orish uchun 5 mingdan ziyod nasos ishlatilib, yiliga 7 milliard kilovatt soat elektr sarflanadi. Lekin, 80 foiz nasoslar 35-40 yildan beri ishlatilib, o‘z resursini o‘tab bo‘lgan.
Davlat rahbari suv xo‘jaligidagi bunday vaziyatdan chuqur tashvishdaligini qayd etib, soha mutasaddilariga qattiq eʼtiroz bildirdi.
“Kanallarni beton qilish orqali yo‘qotishlarni kamaytirish, nasoslarni energiya tejamkoriga almashtirish, suv inshootlarida avtomatlashgan hisoblagich o‘rnatish yuzasidan topshiriqlar berildi”, — deyiladi xabarda.
Shavkat Mirziyoyev 22-sentyabr kuni aholini sifatli ichimlik suvi bilan ta’minlash masalalari bo‘yicha yig‘ilish o‘tkazgandi. Unga ko‘ra, mamlakatda aholi salomatligini yaxshilash va hayot sifatini oshirishga qaratilgan ko‘plab ijtimoiy, hududiy dasturlar bajarilmoqda. Xususan, so‘nggi olti yilda ichimlik suvi sohasiga davlat budjetidan 14 trillion 500 milliard so‘m yoki oldingi davrga nisbatan 6 baravar ko‘p mablag‘ ajratilgan.
Izoh (0)