Qozog‘iston hukumati Rossiyaga birorta ham tovar eksportini taqiqlagani yo‘q. Bu haqda respublika Savdo va integratsiya vazirligi matbuot xizmati xabar berdi.
“Ommaviy axborot vositalarida G‘arb sanksiyalari tufayli Rossiyaga 106 turdagi tovarlarni sotish taqiqlangani haqida tarqalgan xabarlarga kelsak, Qozog‘iston Respublikasi Savdo va integratsiya vazirligi bu noto‘g‘ri ma’lumot ekanini rasman e’lon qiladi”, — deb ta’kidlagan vazirlik.
19-oktyabr kuni rossiyalik va qozog‘istonlik jurnalistlar savdo va integratsiya vaziri o‘rinbosari Qayrat To‘rabayevga tayanib, Qozog‘iston sanksiyalar tufayli Rossiyaga harbiy maqsadlar uchun mo‘ljallangan 106 turdagi tovarlar eksportini cheklagani haqida yozgandi.
“Qozog‘iston va Rossiya o‘rtasidagi savdo munosabatlarini tartibga solish Yevroosiyo iqtisodiy ittifoqi to‘g‘risidagi shartnoma qoidalariga to‘liq mos keladi. Rossiyaga qarshi sanksiyalar munosabati bilan Rossiya Federatsiyasiga birorta ham tovarni eksport qilish taqiqlanmagan.
Shu bilan birga, eksport nazorati ostida bo‘lgan “ikki maqsadli” deb ataluvchi tovarlar savdosi Qozog‘iston Respublikasining xalqaro majburiyatlariga muvofiq amalga oshirilishini ta’kidlaymiz. Qozog‘iston qonunchiligiga muvofiq, bunday tovarlarga nisbatan eksport, import va tranzit uchun tegishli litsenziya olish kerak. Eksportni nazorat qilish tizimi savdo siyosatining alohida sohasi bo‘lib, u ikki maqsadli tovarlarni olib kirish, eksport qilish va tranzit qilish uchun zarur bo‘lgan ruxsatnomalarni olishni nazarda tutadi. Eksport nazorati milliy vakolat doirasiga kiradi, bu ham YOII to‘g‘risidagi shartnomada ko‘zda tutilgan”, — deyiladi Savdo vazirligi raddiyasida.
Vazirlik taʼkidlashicha, ikki maqsadli mahsulotlar eksporti nazorati 20 yildan ortiq vaqtdan beri xalqaro eksport nazorati rejimiga muvofiq amalga oshirilib kelmoqda.
Ukraina hududida urush boshlanganidan so‘ng G‘arb davlatlari tomonidan Rossiyaga qarshi joriy qilingan sanksiyalar eksport cheklovlarini ham, Rossiya aktivlarini muzlatishni ham nazarda tutadi.
Sentyabr oxirida Qozog‘iston prezidenti Qosim-Jo‘mart To‘qayev Germaniyaga tashrifi chog‘ida Ostona Rossiya Federatsiyasiga nisbatan joriy qilingan sanksiyalar rejimiga amal qilishini qatiy ta’kidlagandi.
Shu bilan birga, Qozog‘iston rahbari sanksiyalarni xalqaro munosabatlarni o‘rnatish nuqtayi nazaridan samarasiz deb atadi va Qozog‘iston “anti-Rossiya” emasligiga ishontirdi. Bunday atama Rossiya prezidenti Vladimir Putin tomonidan 2021-yil iyul oyida Ukrainaga nisbatan qo‘llangan.
Izoh (0)