Ukrainada keng ko‘lamli urush boshlanganidan so‘ng Qozog‘iston Rossiyaga 106 turdagi harbiy tovarlar, jumladan, dronlar, chiplar, ixtisoslashtirilgan elektronika va boshqa mahsulotlar eksportini chekladi, dedi respublika savdo va integratsiya vaziri o‘rinbosari Qayrat To‘rebayev Tengrinews’ga.
“Asosiy muammo eksport bilan bog‘liq. Biz barcha tovarlarni (Rossiya hududi orqali) eksport qilamiz. Faqat urushga oid tovarlar eksporti cheklangan”, — deydi u.
Bahorda AQSH G‘arbning Rossiyaga kiritgan sanksiyalarini chetlab o‘tishga urinishlar tufayli Qozog‘istonni ikkilamchi sanksiyalarga duchor bo‘lish xavfidan ogohlantirgandi.
Qozog‘iston Tashqi ishlar vazirligi respublika G‘arb sanksiyalari ostiga tushmaslik uchun barcha sa’y-harakatlarini amalga oshirayotganiga ishontirdi. Prezident Qosim-Jo‘mart To‘qayev Rossiyaga qarshi sanksiyalarga “shak-shubhasiz” amal qilishini, bu borada G‘arb davlatlarida xavotir bo‘lmasligi kerakligini ta’kidladi.
Shu bilan birga, Qozog‘iston rahbari sanksiyalarni xalqaro munosabatlarni o‘rnatish nuqtayi nazaridan samarasiz deb atadi va Qozog‘iston “anti-Rossiya” emasligiga ishontirdi. Bunday atama Rossiya prezidenti Vladimir Putin tomonidan 2021-yil iyul oyida Ukrainaga nisbatan qo‘llangan.
Izoh (0)