Қозоғистон ҳукумати Россияга бирорта ҳам товар экспортини тақиқлагани йўқ. Бу ҳақда республика Савдо ва интеграция вазирлиги матбуот хизмати хабар берди.
“Оммавий ахборот воситаларида Ғарб санкциялари туфайли Россияга 106 турдаги товарларни сотиш тақиқлангани ҳақида тарқалган хабарларга келсак, Қозоғистон Республикаси Савдо ва интеграция вазирлиги бу нотўғри маълумот эканини расман эълон қилади”, — деб таъкидлаган вазирлик.
19 октябрь куни россиялик ва қозоғистонлик журналистлар савдо ва интеграция вазири ўринбосари Қайрат Тўрабаевга таяниб, Қозоғистон санкциялар туфайли Россияга ҳарбий мақсадлар учун мўлжалланган 106 турдаги товарлар экспортини чеклагани ҳақида ёзганди.
“Қозоғистон ва Россия ўртасидаги савдо муносабатларини тартибга солиш Евроосиё иқтисодий иттифоқи тўғрисидаги шартнома қоидаларига тўлиқ мос келади. Россияга қарши санкциялар муносабати билан Россия Федерациясига бирорта ҳам товарни экспорт қилиш тақиқланмаган.
Шу билан бирга, экспорт назорати остида бўлган “икки мақсадли” деб аталувчи товарлар савдоси Қозоғистон Республикасининг халқаро мажбуриятларига мувофиқ амалга оширилишини таъкидлаймиз. Қозоғистон қонунчилигига мувофиқ, бундай товарларга нисбатан экспорт, импорт ва транзит учун тегишли лицензия олиш керак. Экспортни назорат қилиш тизими савдо сиёсатининг алоҳида соҳаси бўлиб, у икки мақсадли товарларни олиб кириш, экспорт қилиш ва транзит қилиш учун зарур бўлган рухсатномаларни олишни назарда тутади. Экспорт назорати миллий ваколат доирасига киради, бу ҳам ЁИИ тўғрисидаги шартномада кўзда тутилган”, — дейилади Савдо вазирлиги раддиясида.
Вазирлик таъкидлашича, икки мақсадли маҳсулотлар экспорти назорати 20 йилдан ортиқ вақтдан бери халқаро экспорт назорати режимига мувофиқ амалга оширилиб келмоқда.
Украина ҳудудида уруш бошланганидан сўнг Ғарб давлатлари томонидан Россияга қарши жорий қилинган санкциялар экспорт чекловларини ҳам, Россия активларини музлатишни ҳам назарда тутади.
Сентябрь охирида Қозоғистон президенти Қосим-Жўмарт Тўқаев Германияга ташрифи чоғида Остона Россия Федерациясига нисбатан жорий қилинган санкциялар режимига амал қилишини қатий таъкидлаганди.
Шу билан бирга, Қозоғистон раҳбари санкцияларни халқаро муносабатларни ўрнатиш нуқтаи назаридан самарасиз деб атади ва Қозоғистон “анти-Россия” эмаслигига ишонтирди. Бундай атама Россия президенти Владимир Путин томонидан 2021 йил июль ойида Украинага нисбатан қўлланган.
Изоҳ (0)