Adliya vazirligi tomonidan Davlat budjeti mablag‘lari hisobidan qoplanadigan, tuman (shahar) darajasida ambulator va statsionar sharoitda ko‘rsatiladigan tibbiy yordamning kafolatlangan hajmlari ro‘yxati davlat ro‘yxatidan o‘tkazildi.
Ushbu ro‘yxatda oilaviy shifokor punktlari, oilaviy poliklinikalar, ko‘p tarmoqli markaziy poliklinikalar, tuman (shahar)lar markaziy shifoxonalarida (jumladan, tug‘uruq majmualari) (tibbiyot muassasalari) ko‘rsatiladigan tibbiy yordamning kafolatlangan hajmlari belgilandi. Taʼkidlanishicha, ushbu hujjat qabul qilinishi natijasida fuqarolar ro‘yxatda nazarda tutilgan tibbiy yordamlarni davlat hisobidan olishga, bu esa konstitutsiyada belgilangan shaxslarning ijtimoiy huquqidan amalda foydalanishga olib keladi.
Xususan, ro‘yxatda:
- tibbiyot muassasalarida ko‘rsatiladigan tibbiy yordamning kafolatlangan hajmlari (masalan, haj va umra tadbirlariga boradigan shaxslarni ruhiy-asab, narkologiya, teri-tanosil, sil kasalliklari va boshqa kasalliklarni aniqlash yuzasidan tibbiy ko‘rikdan o‘tkazish, shuningdek emlash, hayotga xavf soladigan holatlarda (asfiksiya, yurak to‘xtashi, anafilaktik shok va boshqalar) tibbiy yordam ko‘rsatish, profilaktik ko‘riklar va skrining tekshiruvlari);
- tibbiyot muassasalarida ko‘rsatiladigan tibbiy yordamning kafolatlangan hajmlariga kiritilgan tashxislar (masalan, yurakning gipertenziv kasalligi, yurak surunkali ishemik kasalligi, oshqozon yara kasalligi, o‘n ikki barmoqli ichak yara kasalligi, jigar sirrozi);
- dori vositalari va tibbiy buyumlar (masalan, analeptiklar, balg‘am ko‘chiruvchi vositalar, antidepressantlar, tibbiy bintlar, tibbiyot pipetkalari, qo‘lqoplar) nazarda tutilgan.
Maʼlumot uchun: O‘zbekiston Respublikasi Konstitusiyasining 48-moddasida har kim sog‘lig‘ini saqlash va malakali tibbiy xizmatdan foydalanish huquqiga ega ekanligi va O‘zbekiston Respublikasi fuqarolari tibbiy yordamning kafolatlangan hajmini belgilangan tartibda davlat hisobidan olishga haqli ekanligi belgilangan.
Izoh (0)