Shavkat Mirziyoyev Belarusning Shanxay hamkorlik tashkilotiga (SHHT) a’zo davlat maqomini olish bo‘yicha majburiyatlari to‘g‘risidagi memorandumni tasdiqlash to‘g‘risidagi qarorni imzoladi.
Prezident TIVga mazkur xalqaro shartnomaning kuchga kirishi uchun zarur bo‘lgan barcha davlat ichki tartib-taomillari bajarilgani to‘g‘risida SHHT kotibiyatiga bildirishnoma yuborishni topshirdi.
Belarus SHHT a’zosi maqomini olish uchun 2022-yil iyul oyida ariza topshirgandi. Oradan bir yil o‘tib, tashkilotning Nyu-Dehlidagi sammitida aʼzolik maqomini olish uchun ushbu mamalakatning majburiyatlari to‘g‘risidagi memorandum imzolandi.
SHHT 2001-yil 15-iyunda Shanxayda tashkil topgan. Dastlab tashkilot tarkibiga oltita davlat — Qozog‘iston, Xitoy, Qirg‘iziston, Rossiya, Tojikiston va O‘zbekiston kirgan, 2017-yilda Hindiston va Pokiston ham qo‘shilgan. 2023-yilning iyulida unga Eron ham a’zo bo‘ldi.
Izoh (0)