AQSH prezidenti Jo Bayden HAMAS tomonidan Isroilga uyushtirilgan hujumlarini “terrorchilik harakati” deb atadi va Isroil javob berishga “to‘liq haqli” ekanini ta’kidladi.
“Bu terrorizm. Biz Isroil bilan birgamiz. Isroil o‘z fuqarolari haqida qayg‘urishi, o‘zini himoya qilishi va bu hujumga javob berishi uchun zarur bo‘lgan hamma narsa bilan ta’minlanishi haqida g‘amxo‘rlik qilamiz. Terrorizmni hech qanday tarzda oqlash yo‘q”, — dedi u.
AQSH prezidenti har qanday uchinchi davlat yoki tashkilotni Falastin va Isroil o‘rtasidagi ziddiyat kuchayib borayotganidan foydalanishga urinishdan qaytishga chaqirdi.
“Har qanday davlat, tashkilot yoki ushbu vaziyatdan foydalanishni o‘ylayotgan har bir kishiga bir gapni aytishimga ijozat bering: bunday qilmang. Bunday qilmang. Yuragimiz ezilgan bo‘lishi mumkin, ammo bizning qat’iyatimiz bukilmaydi. HAMAS falastinliklarni himoya qilmayapti, balki ulardan tirik qalqon sifatida foydalanmoqda”, — dedi Bayden.
Oq uy rahbari HAMAS harakati tomonidan garovga olinganlar orasida AQSH fuqarolari borligi haqidagi ma’lumotni tasdiqladi.
“Bilamizki, HAMAS tomonidan ushlab turilganlar orasida amerikaliklar ham bor. Men o‘z jamoamga razvedka ma’lumotlari bilan almashishni va isroillik hamkasblariga garovga olinganlarni qaytarish bo‘yicha maslahat berish uchun AQSH hukumatidan qo‘shimcha ekspertlarni yuborishni buyurdim”, — dedi Bayden.
AQSH prezidenti ziddiyat boshlanganidan beri kamida 14 nafar amerikalik halok bo‘lganini aytdi.
“Bu mutlaq yovuzlikdir. 1 mingdan ortiq tinch aholi Isroilda nafaqat o‘ldirildi, balki qirg‘in qilindi. Ular orasida kamida 14 amerikalik halok bo‘ldi”, — dedi Bayden.
AQSH prezidenti Kongress bilan Isroil ehtiyojlari uchun mablag‘ ajratish masalasini tezkor ko‘rib chiqish niyatida ekanini aytdi.
Keyinroq AQSH tomonidan favqulodda harbiy yordam doirasida yuborilgan o‘q-dorilarning birinchi partiyasi ortilgan samolyot Isroilga qo‘ngani haqida xabar berildi.
Izoh (0)