Isroil mudofaa kuchlari HAMASning iqtisodiyot vaziri Javad Abu Shamalni o‘ldirganini e’lon qildi. Bu haqda Isroil harbiylarining X (sobiq Twitter) ijtimoiy tarmog‘idagi postda aytiladi.
Isroil armiyasi qayd etishicha, Abu Shamal HAMASning moliyaviy ishlarini boshqargan hamda “G‘azo sektori ichida va tashqarisida terrorizmni moliyalashtirish uchun pul ajratgan”.
Xabarda aytilishicha, Abu Shamal ilgari HAMAS xavfsizlik xizmatida ishlab, “Isroil fuqarolariga zarar yetkazishga qaratilgan qator operatsiyalarni boshqargan”.
Isroil armiyasining G‘azo sektoriga bergan zarbalari oqibatida HAMASning yana bir yuqori martabali a’zosi Zakariya Abu Maamar ham halok bo‘ldi, deb xabar berdi Sky News Isroil mudofaa kuchlariga tayanib.
Keyinroq HAMAS a’zolari Reuters agentligiga Javad Abu Shamal hamda Zakariya Abu Maamarning o‘limini tasdiqladi. Agentlik ma’lumotlariga ko‘ra, Shamal va Maamar G‘azo sektori janubidagi Xon Yunis shahriga berilgan aviazarba oqibatida halok bo‘lgan.
HAMAS 7-oktyabr kuni ertalab Isroilga raketa hujumlarini boshladi Bunga javoban Isroil armiyasi G‘azo sektoriga yirik zarbalar berdi. Isroil rasmiylari mamlakat urush holatida ekanini rasman e’lon qildi.
Soat 18:30 holatiga ko‘ra, Isroil tomonidan 1000 kishi halok bo‘lgan va 3400 kishi yaralangan. Falastin tomoni Isroilning G‘azo sektoriga bergan zarbalari oqibatida 700 kishi halok bo‘lganini, yana to‘rt mingga yaqin kishi jarohatlanganini ma’lum qildi.
Izoh (0)