АҚШ президенти Жо Байден ҲАМАС томонидан Исроилга уюштирилган ҳужумларини “террорчилик ҳаракати” деб атади ва Исроил жавоб беришга “тўлиқ ҳақли” эканини таъкидлади.
“Бу терроризм. Биз Исроил билан биргамиз. Исроил ўз фуқаролари ҳақида қайғуриши, ўзини ҳимоя қилиши ва бу ҳужумга жавоб бериши учун зарур бўлган ҳамма нарса билан таъминланиши ҳақида ғамхўрлик қиламиз. Терроризмни ҳеч қандай тарзда оқлаш йўқ”, — деди у.
АҚШ президенти ҳар қандай учинчи давлат ёки ташкилотни Фаластин ва Исроил ўртасидаги зиддият кучайиб бораётганидан фойдаланишга уринишдан қайтишга чақирди.
“Ҳар қандай давлат, ташкилот ёки ушбу вазиятдан фойдаланишни ўйлаётган ҳар бир кишига бир гапни айтишимга ижозат беринг: бундай қилманг. Бундай қилманг. Юрагимиз эзилган бўлиши мумкин, аммо бизнинг қатъиятимиз букилмайди. ҲАМАС фаластинликларни ҳимоя қилмаяпти, балки улардан тирик қалқон сифатида фойдаланмоқда”, — деди Байден.
Оқ уй раҳбари ҲАМАС ҳаракати томонидан гаровга олинганлар орасида АҚШ фуқаролари борлиги ҳақидаги маълумотни тасдиқлади.
“Биламизки, ҲАМАС томонидан ушлаб турилганлар орасида америкаликлар ҳам бор. Мен ўз жамоамга разведка маълумотлари билан алмашишни ва исроиллик ҳамкасбларига гаровга олинганларни қайтариш бўйича маслаҳат бериш учун АҚШ ҳукуматидан қўшимча экспертларни юборишни буюрдим”, — деди Байден.
АҚШ президенти зиддият бошланганидан бери камида 14 нафар америкалик ҳалок бўлганини айтди.
“Бу мутлақ ёвузликдир. 1 мингдан ортиқ тинч аҳоли Исроилда нафақат ўлдирилди, балки қирғин қилинди. Улар орасида камида 14 америкалик ҳалок бўлди”, — деди Байден.
АҚШ президенти Конгресс билан Исроил эҳтиёжлари учун маблағ ажратиш масаласини тезкор кўриб чиқиш ниятида эканини айтди.
Кейинроқ АҚШ томонидан фавқулодда ҳарбий ёрдам доирасида юборилган ўқ-дориларнинг биринчи партияси ортилган самолёт Исроилга қўнгани ҳақида хабар берилди.
Изоҳ (0)