Xitoyga bo‘lgan terror tahdidi “o‘zimizga tahdid bo‘ladi” dedi “Tolibon” tashqi ishlar vaziri Amirxon Muttaqiy Pekin rasmiylari bilan uchrashuvda. Amirxon Muttaqiy “Tolibon” Afg‘onistonda xitoyliklarni nishonga olgan terrorchilik harakatlariga toqat qilmasligini aytdi, deb xabar bermoqda SCMP.
Tibetning Ningchi shahrida Xitoy tashqi ishlar vaziri Van I bilan uchrashgan Muttaqiy “Tolibon” terrorizmga qarshi kurashda ko‘p ishlarni amalga oshirganini ta’kidladi.
“Afg‘onistonda Xitoy xavfsizligi va barqarorligiga ziyon yetkazishi mumkin bo‘lgan hech bir harakatga yo‘l qo‘ymaymiz”, — dedi u.
Afg‘onistonda Xitoy fuqarolariga qarshi teraktlar uchrab turadi. Dekabr oyida ISHID terrorchilari Kobuldagi mehmonxonada uyushtirgan portlashda besh nafar Xitoy fuqarosi yaralangan edi. Oradan bir oy o‘tib, Xitoy diplomatik delegatsiyasi bilan muzokara olib borilayotgan Afg‘oniston Tashqi ishlar vazirligiga hujum uyushtirildi.
Van I afg‘on tomoni terrorizmga qarshi kurashni davom ettirishiga va Afg‘onistonda joylashgan “ISHID terrorchi kuchlarini to‘liq yo‘q qilishiga” umid bildirdi.
“Biz Afg‘onistonga qo‘shnilar bilan munosabatlarni rivojlantirish va mintaqaviy iqtisodiy hamkorlikni yaxshilashda yordam berishda davom etishni istaymiz”, — dedi.
Shuningdek, Van I Xitoyning Afg‘oniston bilan diplomatik munosabatlariga hech bir davlat ta’sir o‘tkazmasligi va Xitoy o‘zining an’anaviy do‘stligini davom ettirishini aytgan. U Pekin Afg‘onistonda inklyuziv hukumat shakllanishini qo‘llab-quvvatlashini ta’kidlagan.
2021-yil avgustida “Tolibon” hokimiyatni qo‘lga kiritganidan keyin Afg‘onistonda kam sonli davlatlarning diplomatik ishtiroki saqlanib qolgan, ular orasida Xitoy ham bor.
Izoh (0)