Хитойга бўлган террор таҳдиди “ўзимизга таҳдид бўлади” деди “Толибон” ташқи ишлар вазири Амирхон Муттақий Пекин расмийлари билан учрашувда. Амирхон Муттақий “Толибон” Афғонистонда хитойликларни нишонга олган террорчилик ҳаракатларига тоқат қилмаслигини айтди, деб хабар бермоқда СCМП.
Тибетнинг Нингчи шаҳрида Хитой ташқи ишлар вазири Ван I билан учрашган Муттақий “Толибон” терроризмга қарши курашда кўп ишларни амалга оширганини таъкидлади.
“Афғонистонда Хитой хавфсизлиги ва барқарорлигига зиён етказиши мумкин бўлган ҳеч бир ҳаракатга йўл қўймаймиз”, — деди у.
Афғонистонда Хитой фуқароларига қарши терактлар учраб туради. Декабрь ойида ИШИД террорчилари Кобулдаги меҳмонхонада уюштирган портлашда беш нафар Хитой фуқароси яраланган эди. Орадан бир ой ўтиб, Хитой дипломатик делегацияси билан музокара олиб борилаётган Афғонистон Ташқи ишлар вазирлигига ҳужум уюштирилди.
Ван I афғон томони терроризмга қарши курашни давом эттиришига ва Афғонистонда жойлашган “ИШИД террорчи кучларини тўлиқ йўқ қилишига” умид билдирди.
“Биз Афғонистонга қўшнилар билан муносабатларни ривожлантириш ва минтақавий иқтисодий ҳамкорликни яхшилашда ёрдам беришда давом этишни истаймиз”, — деди.
Шунингдек, Ван I Хитойнинг Афғонистон билан дипломатик муносабатларига ҳеч бир давлат таъсир ўтказмаслиги ва Хитой ўзининг анъанавий дўстлигини давом эттиришини айтган. У Пекин Афғонистонда инклюзив ҳукумат шаклланишини қўллаб-қувватлашини таъкидлаган.
2021 йил августида “Толибон” ҳокимиятни қўлга киритганидан кейин Афғонистонда кам сонли давлатларнинг дипломатик иштироки сақланиб қолган, улар орасида Хитой ҳам бор.
Изоҳ (0)