“Tolibon” Xitoyni Afg‘onistonning asosiy hamkori deb atadi

Afg‘onistonda hokimiyat tepasiga kelgan “Tolibon” harakati Xitoyni o‘zining asosiy xalqaro hamkori deb biladi. Bu haqda harakat vakili Zabihulla Mujohid ma’lum qildi.

“Xitoy — bizning bosh hamkorimiz, mamlakatimizga sarmoya kiritishga va uni qayta qurishga tayyorligi bilan Xitoy biz uchun muhim va alohida imkoniyatdir”, — dedi Mujohid Italiyaning  La Repubblica gazetasiga bergan intervyusida.

Mujohid Pekinning “Bir kamar — bir yo‘l” dasturini yuqori e’tirof etib, u “qadimiy Ipak yo‘lini qayta tiklashga xizmat qilishini” ta’kidladi.

U, shuningdek, Xitoy Afg‘onistonda tog‘-kon sanoati tiklanishiga yordam berishiga umid bildirdi. “Qolaversa, bizda misga boy konlar bor, xitoyliklarning yordami bilan ularni ishlab chiqarishga qaytarish va modernizatsiya qilish mumkin”, — deydi “Tolibon” vakili.

“Xitoy — bizni  butun dunyo bozorlariga olib chiqadigan darvozamiz”, — deya ta’kidladi Mujohid.

Avvalroq Xitoy tashqi ishlar vazirining yordamchisi U Szyanxao “Tolibon”ning Qatardagi siyosiy idorasi direktori o‘rinbosari Abdulla Salam Hanafiy bilan telefon orqali muloqot qilgani haqida xabar berilgan.

U Szyanxaoning so‘zlariga ko‘ra, Afg‘onistondagi vaziyat tub o‘zgarishlarga uchragan va “Afg‘oniston kelajagi yana afg‘on xalqi qo‘lida”.

Xitoylik diplomatning ta’kidlashicha, Pekin har doim Afg‘oniston suvereniteti, mustaqilligi va hududiy yaxlitligini hurmat qilgan va butun afg‘on xalqiga nisbatan do‘stona siyosat olib borgan. U Afg‘oniston “tez orada tinchlik va barqarorlikka erishishiga va mamlakat go‘zalligi qayta tiklanishiga” umid bildirdi.

Tashqi ishlar vazirligida qayd etilishicha, Hanafiy “Xitoy Afg‘onistonning ishonchli do‘sti” degan.

“Tolibon” Afg‘oniston va Xitoy o‘rtasidagi do‘stona munosabatlarni rivojlantirishga sodiqlikni saqlashga tayyor va hech qachon Afg‘oniston hududidan birorta kuchning Xitoy manfaatlariga tahdid solishiga yo‘l qo‘ymaydi, shuningdek, Afg‘onistondagi Xitoy muassasalari va xodimlarining xavfsizligini ta’minlash uchun ham samarali choralar ko‘radi”, — dedi u.

Hanafiyning so‘zlariga ko‘ra, afg‘on rasmiylari Xitoyning Afg‘oniston va mintaqaning rivojlanishi hamda gullab-yashnashiga hissa qo‘shadigan “Bir kamar — bir yo‘l” dasturini qo‘llab-quvvatlash va dastur doirasida hamkorlik qilishga tayyor.