Xitoy 2021-yilda “Tolibon” hokimiyat tepasiga kelganidan beri Afg‘onistonga elchi tayinlagan birinchi davlat bo‘ldi. Bu haqda Deutsche Welle xabar berdi.
“Tolibon” hukmronligi ostidagi Afg‘oniston hech bir hukumat tomonidan rasman tan olinmagan. Xitoy elchining tayinlanishi “Tolibon” hukumatini rasman tan olish yo‘lidagi qadammi yoki yo‘qligiga aniqlik kiritmadi.
Kobuldagi rasmiy marosimda Xitoy elchisi Chjao Sin “Tolibon” Bosh vaziri vazifasini bajaruvchi Muhammad Hasan Oxundga ishonch yorliqlarini topshirdi.
Elchi Chjao Sinning mashinasini politsiya otryadi prezident qarorgohigacha olib bordi. Uni forma kiygan askarlar va “Tolibon”ning yuqori martabali amaldorlari kutib olishdi.
“Bu Xitoy va Afg‘oniston o‘rtasidagi muloqot va hamkorlikni yanada rivojlantirishga qaratilgan Xitoyning Afg‘onistondagi elchisining normal rotatsiyasi. Xitoyning Afg‘onistonga nisbatan siyosati aniq va izchildir”, — deyiladi Xitoy TIV bayonotida.
Muhammad Hasan Oxund ushbu tayinlov ikki davlat munosabatlarida “yangi sahifaning boshlanishi” bo‘lishiga umid bildirdi.
“Xitoy Afg‘onistonning anʼanaviy do‘stona qo‘shnisi sifatida u bilan turli sohalarda diplomatik aloqalar, almashuvlar va hamkorlikni davom ettirib kelgan”, — deyiladi Xitoy Tashqi ishlar vazirligi bayonotida.
“Tolibon”ning bosh matbuot kotibi Zabihulloh Mujohid elchining tayinlanishini olqishladi.
“Bu, shuningdek, boshqa mamlakatlar Islom Amirligi bilan aloqaga kirishishi uchun signaldir. Biz yaxshi muloqot orqali yaxshi munosabatlar o‘rnatishimiz kerak. Bu orqali oldimizda turgan yoki kelajakda paydo bo‘ladigan barcha muammolarni hal qila olamiz”, — dedi u.
Xitoyning Afg‘onistondagi avvalgi elchisi Van Yuy 2019-yilda lavozimga kirishgan va o‘tgan oy lavozimini tark etgan edi.
Izoh (0)