Samarqand shahrida Markaziy Osiyoning barcha 5 davlatidan tashrif buyurgan 60 nafar ekofaollar ishtirokida ekoforum davom etmoqda. Samarqand sayyohlik markazidagi Minyoun mehmonxonasida ishtirokchilar o‘rtasida Eko-Zakovat intellektual o‘yini o‘tkazildi.
Zakovat o‘yini turli xil tematikalar bo‘yicha o‘tkazilgan, lekin faqat ekologik mavzudagi intellektual bahsni bu o‘yin muxlislari ko‘rishmagandi. Bunday “ilm jangi”ning birinchisida Markaziy Osiyo ekofaollari ishtirok etishdi. Ekoforum ishtirokchilari 11 ta jamoaga bo‘linishdi.
Umumiy hisobga ikkita davradan iborat Eko-Zakovatda 36 ta savol o‘ynaldi. Yakuniy natijalarga ko‘ra uch jamoa bir xil – 16 tadan ochko to‘pladi. G‘olib esa hal qiluvchi “Otishma” shartida aniqlandi. Bu shartda jamoalardan biri to‘g‘ri javob topgunga qadar savollar berildi. Oxir-oqibat M&Ms jamoasi g‘olib bo‘lib, maxsus kubokni qo‘lga kiritdi.
O‘yin davomida ishtirokchilarga faqat ekologik mavzularda savollar berilganini taʼkidlash kerak. Masalan, quyidagiga o‘xshagan:
Savol: Koreyalik fermerlar restoranlardan chiqayotgan chiqindilarni yegan cho‘chqalar o‘lib qolayotganidan eʼtiroz bildirgani uchun koreys restoranlarida uni taqiqlashadi. Nimani?
Javob: Tish kovlagichni.
Savol: Nyu-Yorkda olinishi kerak bo‘lgan baʼzi kinolar Manchesterda ham suratga olingan. Bunday holatda Manchesterdagi suratga olish jamoasidagi maxsus xodimlar suratga olish maydonchasida qo‘liga paket olib o‘sha ishni qilgan. Qanday ishni?
Javob: Chiqindi to‘kib chiqqan. Chunki Manchester juda toza shahar bo‘lgani uchun kadrlar Nyu-Yorkni eslatib turishi uchun ko‘chalarga chiqindi to‘kib chiqishgan.
Savol: 1960-yil Boykanurdagi kosmik stansiyada portlash bo‘lib ko‘pchilik halok bo‘ladi. Ammo bosh konstruktor omon qoladi. Chunki u taqiqlangan bir ishni qilgandi. Qanday ishni?
Javob: Sigaret chekish uchun tashqariga chiqqandi. Buni chekish odamni o‘ldirmaydigan istisno holat deb atash mumkin.
Shu va shunga o‘xshash qiziqarli ekosavollar orqali forum ishtirokchilari o‘z bilimlarini yana bir bor charxlab olishdi. Samarqanddagi ekoforum 4-oktyabrgacha davom etadi.
Izoh (0)