Jinoyat ishlari bo‘yicha Yakkasaroy tumani sudida fuqarolarni chuv tushirgan ayol va uning qiziga nisbatan sud ishi ko‘rib chiqildi. Bu haqda “Hudud” informatsion dasturida ma’lum qilindi.

Qayd etilishicha, Yunusobod tumanida istiqomat qiluvchi ikki shaxs Turkiyaning bir qator universitetlariga o‘qishga kirgizib qo‘yishni va’da qilib, 400 dan ortiq fuqarodan 5-9 million so‘mgacha pul olgan.

Sudlanuvchilar o‘rta ta’lim maktablarining yuqori sinf o‘quvchilariga o‘zlarini Turkiya universitetlarining rasmiy filiali vakillari sifatida tanishtirib, ishonchga kirgan. Ular hatto dars jarayonlarini ham tashkil etib, unga Turkiyada o‘qituvchilarni ham jalb etgan.

Shu kunga qadar jabrlanuvchilarning 100 dan ortig‘i ko‘rsatma bergan bo‘lib, jinoyat ish bo‘yicha sud hali davom etmoqda.

Avvalroq, Farg‘ona, Andijon, Guliston davlat universitetlari va “Narxoz”ga o‘qishga kiritib qo‘yish evaziga pul olgan shaxslar ushlangani xabar qilingandi. Shuningdek, Andijonda o‘qishga kiritishni vaʼda qilib, 4 ming AQSH dollari olgan OTM xodimi qo‘lga olingan edi.