Самарқанд шаҳрида Марказий Осиёнинг барча 5 давлатидан ташриф буюрган 60 нафар экофаоллар иштирокида экофорум давом этмоқда. Самарқанд сайёҳлик марказидаги Minyoun меҳмонхонасида иштирокчилар ўртасида Эко-Заковат интеллектуал ўйини ўтказилди.
Заковат ўйини турли хил тематикалар бўйича ўтказилган, лекин фақат экологик мавзудаги интеллектуал баҳсни бу ўйин мухлислари кўришмаганди. Бундай “илм жанги”нинг биринчисида Марказий Осиё экофаоллари иштирок этишди. Экофорум иштирокчилари 11 та жамоага бўлинишди.
Умумий ҳисобга иккита даврадан иборат Эко-Заковатда 36 та савол ўйналди. Якуний натижаларга кўра уч жамоа бир хил – 16 тадан очко тўплади. Ғолиб эса ҳал қилувчи “Отишма” шартида аниқланди. Бу шартда жамоалардан бири тўғри жавоб топгунга қадар саволлар берилди. Охир-оқибат М&Мs жамоаси ғолиб бўлиб, махсус кубокни қўлга киритди.
Ўйин давомида иштирокчиларга фақат экологик мавзуларда саволлар берилганини таъкидлаш керак. Масалан, қуйидагига ўхшаган:
Савол: Кореялик фермерлар ресторанлардан чиқаётган чиқиндиларни еган чўчқалар ўлиб қолаётганидан эътироз билдиргани учун корейс ресторанларида уни тақиқлашади. Нимани?
Жавоб: Тиш ковлагични.
Савол: Нью-Йоркда олиниши керак бўлган баъзи кинолар Манчестерда ҳам суратга олинган. Бундай ҳолатда Манчестердаги суратга олиш жамоасидаги махсус ходимлар суратга олиш майдончасида қўлига пакет олиб ўша ишни қилган. Қандай ишни?
Жавоб: Чиқинди тўкиб чиққан. Чунки Манчестер жуда тоза шаҳар бўлгани учун кадрлар Нью-Йоркни эслатиб туриши учун кўчаларга чиқинди тўкиб чиқишган.
Савол: 1960 йил Бойканурдаги космик станцияда портлаш бўлиб кўпчилик ҳалок бўлади. Аммо бош конструктор омон қолади. Чунки у тақиқланган бир ишни қилганди. Қандай ишни?
Жавоб: Сигарет чекиш учун ташқарига чиққанди. Буни чекиш одамни ўлдирмайдиган истисно ҳолат деб аташ мумкин.
Шу ва шунга ўхшаш қизиқарли экосаволлар орқали форум иштирокчилари ўз билимларини яна бир бор чархлаб олишди. Самарқанддаги экофорум 4-октябргача давом этади.
Изоҳ (0)