Adolf Gitlerning Braunau shahridagi sobiq uyi politsiya uchastkasi va tuman politsiya boshqarmasiga aylantiriladi. Qayta qurish ishlari allaqachon boshlangan, deb xabar berdi Orf telekanali.
Qurilish ishlari taxmina 2026-yilning birinchi choragida yakunlanadi. Hukumat qayta qurish uchun 20 million yevro sarflashni rejalashtirmoqda. Uy 2016-yildan beri Avstriya hukumatiga tegishli bo‘lib, ungacha binoda Lebenshilfe federal hayotni qo‘llab-quvvatlash assotsiatsiyasi joylashgan edi: undan nogironlar uchun markaz sifatida foydalanilgan.
Telekanalning aniqlik kiritishicha, uy oldidagi urush va fashizmga qarshi yodgorlik toshi saqlanib qoladi. Qayta qurishdan maqsad — uyning neonatsistlar uchun ziyoratgoh sifatidagi mavqeyini kamaytirish.
2016-yilda Avstriya hukumati Gitler tug‘ilgan uyni buzib tashlashni rejalashtirgandi, chunki u neonatsistlar uchun ziyoratgoh bo‘lib xizmat qiladi. Rasmiylar buzilgan uy o‘rniga ma’muriy tuzilmalar yoki xayriya tashkiloti joylashgan yangi bino qurmoqchi bo‘ldi. Biroq keyinchalik hukumat a’zolari uyni buzish g‘oyasidan voz kechdi.
Gitler 1889-yilda Braunauda tug‘ilgan. U uch yoshga to‘lganda, oilasi u yerdan ko‘chib ketgan. 1938-yilda Gitler Germaniyada hokimiyat tepasiga kelganida, natsistlar uyni sotib oldi. 1952-yilda, diktatorning o‘limidan yetti yil o‘tgach, bino o‘zining birinchi egalari — Pommerlar oilasiga qaytarildi.
Izoh (0)