Қозоғистон ҳукумати сармоявий муҳитни яхшилаш бўйича кенгаш йиғилишини ўтказди, деб хабар бермоқда Қозоғистон бош вазири матбуот хизмати. Жаҳон банки ва Ernst & Young, AstraZeneca, Janssen ва Pfizer компаниялари вакиллари иштирокидаги йиғилишни Алихан Смаилов олиб борди. Қозоғистонда соғлиқни сақлаш соҳасини янада ривожлантириш масалалари муҳокама қилинди.
“Умуман олганда, ҳукумат ушбу соҳани ривожлантиришнинг барқарор моделини яратиш, уни молиялаштириш даражасини 2027 йилгача ЯИМнинг 5 фоизига етказиш устида ишламоқда. Бу борада биз сармоя ва илғор технологияларни жалб этишдан манфаатдормиз. Биз кўраётган чора-тадбирлар соҳанинг сармоявий жозибадорлигига ижобий таъсир кўрсатмоқда.
Шундай қилиб, ўтган йил якунларига кўра, соғлиқни сақлаш соҳасига асосий капиталга йўналтирилган инвестициялар қарийб 30 фоизга ошиб, қарийб 540 миллион долларни ташкил этди. Сўнгги 7 йилда фармацевтика бозори ҳажми 2,9 баробар ошди”, — деди Алихан Смаилов.
Смаиловнинг айтишича, AstraZeneca Қозоғистонда оригинал дори воситалари ишлаб чиқаришга 32 миллион доллар сармоя киритади. Бундан ташқари, Қозоғистон президентининг АҚШга ташрифи чоғида GE Healthcare компанияси билан келишув имзоланган бўлиб, унга кўра, тиббий асбоб-ускуналар ишлаб чиқаришни маҳаллийлаштириш учун 60 миллион доллар ажратилади.
“Дори воситаларига талаб ортиб бораётган бир шароитда соғлиқни сақлаш соҳаси, жумладан, фармацевтика саноатини янада ривожлантириш учун улкан салоҳият мавжуд”, – деди Алихан Смаилов.
Ҳозирда Қозоғистон Республикаси ҳукумати Pfizer компанияси билан дори воситалари ишлаб чиқаришни маҳаллийлаштириш бўйича инвестиция шартномасини тузишни режалаштирмоқда, Roche билан эса 2,5 миллион долларлик бир қатор лойиҳалар, Жанубий Корея инвесторлари билан пудрат ишлаб чиқариш лойиҳалари устида ишламоқда. Туркия, Миср ва Исроил ҳам лойиҳаларни амалга оширишнинг турли босқичларида.
Изоҳ (0)