O‘zbekistonda tuberkulyoz bilan kasallanish ko‘rsatkichini 2010-yilga nisbatan 43 foizga, o‘lim ko‘rsatkichini esa 84 foizga kamaydi. Bu haqda Respublika ixtisoslashtirilgan ftiziatriya va pulmonologiya ilmiy-amaliy tibbiyot markazi direktori Nargiza Parpiyevaga tayanib, SSV matbuot xizmati xabar berdi.
Qayd etilishicha, mamlakatda ushbu sohaning isloh qilinishi natijasida so‘nggi 10 yil ichida qariyb 170 ming nafar inson hayoti saqlab qolingan. Davlat dasturlarida nazarda tutilgan chora-tadbirlarning samarali amalga oshirilishi natijasida tuberkulyoz bilan kasallanish ko‘rsatkichini 2010-yilga nisbatan 43 foizga, o‘lim ko‘rsatkichini esa 84 foizga kamaytirishga erishilgan. Davolash samaradorligi esa 91,2 foizga yetkazilgan.
Oxirgi ikki yilda JSST tavsiyalari asosida ftiziatriya bo‘yicha barcha klinik ko‘rsatmalar yangilangan, jami 1530 nafar mutaxassis qayta tayyorgarlikdan o‘tgan. Bundan tashqari, tuberkulyoz kasalligi tarqalishining oldini olish uchun har yili yangi tug‘ilgan chaqaloqlarning 97 foizi emlanmoqda.
“Avvallari yurtimizda tuberkulyozni aniqlash uchun 3-4 oylab vaqt talab etilardi. Hozirgi kunda esa bu kasallikka genno-molekulyar usuli orqali bor-yo‘g‘i 70 daqiqa ichida aniq tashxis qo‘yilmoqda. Ayni paytda yurtimiz bo‘yicha 97 ta PZR laboratoriyasi faoliyat ko‘rsatmoqda, ulardan 40 tasi birlamchi tibbiy-sanitariya yordami muassasalarida joylashgan”, — deydi Parpiyeva.
Shuningdek, ilg‘or operatsiya usullari joriy etilishi, samarali dori-darmonlar qo‘llanilishi natijasida tuberkulyozning turg‘un shakli bilan kasallangan bemorlarni davolash muddati ham 2 yildan 6-9 oyga qisqargan.
Prezidentning tegishli qarori asosida tasdiqlangan alohida dastur hamda tuberkulyoz kasalligi va pulmonologiya xizmatlarini rivojlantirishning maqsadli ko‘rsatkichlariga ko‘ra:
- 2023-2026-yillarda ushbu maqsadlar uchun davlat byudjetidan 255 million dollar, xalqaro donorlar hisobidan 17 million dollar mablag‘ ajratish ko‘zda tutilgan.
O‘zbekistonning 14 ta maʼmuriy hududida “O‘pka salomatligi” ko‘chma mobil brigadalari tashkil etilib, chekka va olis manzillarda yashovchi aholini bepul tibbiy ko‘rikdan o‘tkazish yo‘lga qo‘yilmoqda.
2022-yil mart oyida AQSH Xalqaro taraqqiyot agentligi (USAID) tomonidan so‘nggi olti oy davomida O‘zbekistonga umumiy qiymati qariyb 700 ming dollarga teng tuberkulyozni tezkor diagnostika qilishga mo‘ljallangan GeneXpert tizimlari beg‘araz taqdim etilgani ma’lum bo‘lgandi.
Izoh (0)