Ўзбекистонда туберкулёз билан касалланиш кўрсаткичини 2010 йилга нисбатан 43 фоизга, ўлим кўрсаткичини эса 84 фоизга камайди. Бу ҳақда Республика ихтисослаштирилган фтизиатрия ва пулмонология илмий-амалий тиббиёт маркази директори Наргиза Парпиевага таяниб, ССВ матбуот хизмати хабар берди.
Қайд этилишича, мамлакатда ушбу соҳанинг ислоҳ қилиниши натижасида сўнгги 10 йил ичида қарийб 170 минг нафар инсон ҳаёти сақлаб қолинган. Давлат дастурларида назарда тутилган чора-тадбирларнинг самарали амалга оширилиши натижасида туберкулёз билан касалланиш кўрсаткичини 2010 йилга нисбатан 43 фоизга, ўлим кўрсаткичини эса 84 фоизга камайтиришга эришилган. Даволаш самарадорлиги эса 91,2 фоизга етказилган.
Охирги икки йилда ЖССТ тавсиялари асосида фтизиатрия бўйича барча клиник кўрсатмалар янгиланган, жами 1530 нафар мутахассис қайта тайёргарликдан ўтган. Бундан ташқари, туберкулёз касаллиги тарқалишининг олдини олиш учун ҳар йили янги туғилган чақалоқларнинг 97 фоизи эмланмоқда.
“Авваллари юртимизда туберкулёзни аниқлаш учун 3-4 ойлаб вақт талаб этиларди. Ҳозирги кунда эса бу касалликка генно-молекуляр усули орқали бор-йўғи 70 дақиқа ичида аниқ ташхис қўйилмоқда. Айни пайтда юртимиз бўйича 97 та ПЗР лабораторияси фаолият кўрсатмоқда, улардан 40 таси бирламчи тиббий-санитария ёрдами муассасаларида жойлашган”, — дейди Парпиева.
Шунингдек, илғор операция усуллари жорий этилиши, самарали дори-дармонлар қўлланилиши натижасида туберкулёзнинг турғун шакли билан касалланган беморларни даволаш муддати ҳам 2 йилдан 6-9 ойга қисқарган.
Президентнинг тегишли қарори асосида тасдиқланган алоҳида дастур ҳамда туберкулёз касаллиги ва пулмонология хизматларини ривожлантиришнинг мақсадли кўрсаткичларига кўра:
- 2023-2026 йилларда ушбу мақсадлар учун давлат бюджетидан 255 миллион доллар, халқаро донорлар ҳисобидан 17 миллион доллар маблағ ажратиш кўзда тутилган.
Ўзбекистоннинг 14 та маъмурий ҳудудида “Ўпка саломатлиги” кўчма мобил бригадалари ташкил этилиб, чекка ва олис манзилларда яшовчи аҳолини бепул тиббий кўрикдан ўтказиш йўлга қўйилмоқда.
2022 йил март ойида АҚШ Халқаро тараққиёт агентлиги (USAID) томонидан сўнгги олти ой давомида Ўзбекистонга умумий қиймати қарийб 700 минг долларга тенг туберкулёзни тезкор диагностика қилишга мўлжалланган GeneXpert тизимлари беғараз тақдим этилгани маълум бўлганди.
Изоҳ (0)