O‘zbekiston—Qozog‘iston chegarasida joylashgan “G‘ishtko‘prik” chegara bojxona posti 2024-yilning martida foydalanishga topshiriladi. Bu haqda Toshkent viloyati bojxona boshqarmasi xabar berdi.
Ijtimoiy tarmoqlarda ushbu chegara bojxona postida kuzatilayotgan tirbandliklar keng muhokamalarga sabab bo‘lmoqda. Toshkent viloyati bojxona boshqarmasi bunga rekonstruksiya ishlari sabab bo‘layotganini eslatib o‘tdi.
Prezidentning 2022-yil 27-apreldagi “Bojxona ma’muriyatchiligini yanada takomillashtirishga doir qo‘shimcha chora-tadbirlar to‘g‘risida”gi farmoniga asosan, mazkur chegara bojxona postini qayta rekonstruksiya va modernizatsiya qilish nazarda tutilgandi.
Qayd etilishicha, ayni kunlarda “G‘ishtko‘prik” chegara bojxona postida qurilish ishlari davom etmoqda. “Navoiy” postida ham zamonaviy bojxona posti qad rostlayapti, shu sababli post yopiq. Assosiy oqim ushbu postga yo‘nalmoqda. Shu sababli ko‘proq “Yallama”dan o‘tish tavsiya qilinmoqda.
“ ‘G‘ishtko‘prik’ chegara bojxona posti orqali bir kunda 30 mingdan 35 mingacha fuqaro va 1000 dan oshiq transport vositasi harakatlanadi. Fuqarolar va transport oqimi yildan yilga ko‘paymoqda, shu uchun post butunlay zamonaviy qiyofa kasb etadi. Post kelgusi yilning mart oyida foydalanishga topshiriladi. Vaqtinchalik noqulayliklar uchun uzr so‘raymiz”, — deyiladi xabarda.
Rekonstruksiyadan so‘ng, postning o‘tkazuvchanlik imkoniyati oshib, bir kunda 1000 ta avtotransport vositalari hamda 50 ming nafargacha yo‘lovchilar bemalol harakatlanishi mumkin bo‘ladi.
Izoh (0)