AQSH rasmiylari Rossiya prezidenti Vladimir Putinni noyabr oyida San-Fransiskoda o‘tkazilishi rejalashtirilgan Osiyo-Tinch okeani iqtisodiy hamkorligi (APEC) sammitiga taklif qilmaydi. Buni Rossiya Tashqi ishlar vazirligining maxsus topshiriqlar bo‘yicha elchisi, APEC’dagi yuqori lavozimli amaldor Marat Berdiyev “RIA Novosti”ga tasdiqladi.
“AQSH ikki tomonlama kanallar orqali bizga bu yil bir qator yetakchilarni taklif qilmoqchi emasligini ma’lum qildi, chunki ularga nisbatan sanksiyalar qo‘llangan”, — dedi Berdiyev.
Putin Ukrainada urush boshlaganidan beri AQSH sanksiyalari ostida — cheklovlar unga Amerikaga kirishni taqiqlaydi va mamlakatdagi aktivlarini bloklaydi.
Washington Post gazetasi AQSH Putinni sammitga taklif qilmaslikka qaror qilgani haqida avgust oyida manbalarga tayangan holda xabar bergandi. Vashington, shuningdek, 2020-yildan beri Amerika sanksiyalari ostida qolayotgan Gonkong maʼmuriyati rahbari Jon Lining tadbirda ishtirok etishini taqiqlashga qaror qildi.
Rossiya prezidenti matbuot kotibi Dmitriy Peskovning “TASS”ga aytishicha, Kreml Vashingtondan sammitda ishtirok etish taklifini kutayotgani yo‘q.
APEC sammiti AQSH raisligida 11—17-noyabr kunlari San-Fransiskoda bo‘lib o‘tadi. Osiyo-Tinch okeani iqtisodiy hamkorligi formati 1989-yilda Avstraliya va Yangi Zelandiya tashabbusi bilan yaratilgan.
Izoh (0)