Kecha ijtimoiy tarmoqlarda Xorazmdagi mehribonlik uyida qizlarni zo‘rlagan amaldorlarga jazo o‘zgarishsiz qoldirilgani haqida xabar tarqaldi. Oliy sud axborot xizmati rahbari Aziz Abidov “Daryo”ning bu haqdagi so‘roviga javoban, tarmoqlarda tarqalayotgan axborot noto‘g‘ri ekanini bildirdi.
Toshkent shahar sudining jinoyat ishlari bo‘yicha sudlov hay’ati apellyasiya instansiyasida ushbu jinoyat ishi ko‘rib chiqilmoqda. Ayni paytda jarayon davom etyapti. Tugamadi. Hali bu masalada sudning na qarori va na yangi hukmi e’lon qilindi. Tarmoqlarda tarqalayotgan axborotlar xato va asoslanmagan, — deydi Aziz Abidov.
Mas’ul sudlar to‘g‘risidagi Qonunning 66-moddasiga ko‘ra, ommaviy axborot vositalari o‘z xabarlarida muayyan ish yuzasidan sud muhokamasi natijalarini oldindan o‘zicha hal qilib qo‘yishga haqli emasligini eslatmoqda.
Mazkur qonunning biz tilga olgan moddasida Ommaviy axborot vositalari o‘z xabarlarida muayyan ish yuzasidan sud muhokamasi natijalarini oldindan o‘zicha hal qilib qo‘yishga yoki sudga qanday shaklda bo‘lmasin ta’sir ko‘rsatishga haqli emas, — deydi Aziz Abidov.
Bu haqda “Daryo” jurnalisti bilan suhbatlashgan advokatga ko‘ra, yopiq sud tarzida o‘tayotgan jarayon ayni kunlarda muzokaralarni yakunlagan. Muzokarada so‘z olgan tomonlar — prokuror va advokatlar holat yuzasidan xulosalarini ma’lum qilgan.
Sudning bu borada yakuniy fikri hali e’lon qilinmadi. Bu haqda yozayotganlar yolg‘on axborot tarqatmoqda. Sud 27-sentabr kuni ish bo‘yicha yakuniy xulosasini e’lon qilishi kutilmoqda, — deydi advokat.
Xorazmda oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani haqida xabar berilgandi. O‘zbekiston prezidenti yordamchisi Saida Mirziyoyeva Xorazmdagi bolalar uyining uch nafar jabrlangan qizlariga xavfsizlik ta’minlanishiga erishilganini aytgandi.
Ularning xavfsizligi, ruhiy va jismoniy tiklanishi hozirda ustuvor masala. Shu bilan bir vaqtda bu kabi vaziyatlarda harakat qilish va eng asosiysi, ularning oldini olish tizimini yaratish ustida ishlashimiz kerak. Qonunlarni qat’iylashtirish va zo‘ravonlikka mutlaq toqatsizlik normalarini yaratish vaqti keldi. Barcha darajalarda. Bu vaziyatda menga umid bag‘ishlaydigan birdan-bir jihat borki, u ham bo‘lsa oshkoralik va fuqarolik jamiyatining ovozi. Ehtimol, busiz atrofda bo‘layotgan voqealardan ojizlarcha bexabar bo‘lib qolardik. Zo‘ravonlik doim bo‘lgan, lekin aynan hozir ochiqlik tufayli ushbu hodisa haqida baland ovoz bilan gapiryapmiz va bunga qarshi kurashish uchun real resurslarimiz paydo bo‘ldi, — degandi o‘shanda Saida Mirziyoyeva.
Bolalar ombudsmani ham mehribonlik uyi qizlariga nisbatan qo‘llanadigan har qanday jinsiy jinoyatlarga og‘ir jazo turlarini qo‘llash kerak, degan pozisiyadaligini bildirgandi. Bosh prokuratura esa Xorazmda mehribonlik uyi qizlari zo‘rlangani ishi bo‘yicha protest kiritgandi.
Izoh (0)