Ўзбекистон президентининг АҚШга амалий ташрифи тадбирларга ғоят бой дастури якунига етиб, давлат раҳбари 21 сентябрь куни Тошкентга қайтиб келди.
Шавкат Мирзиёев Нью-Йорк шаҳрида БМТ Бош Ассамблеяси 78-сессиясининг умумсиёсий мунозараларида нутқ сўзлаб, Ўзбекистонда амалга оширилаётган кенг кўламли ислоҳотларга алоҳида тўхталди ҳамда глобал ва минтақавий кун тартибининг энг долзарб масалалари ечимига қаратилган қатор ташаббусларни илгари сурди.
Марказий Осиё мамлакатлари ва АҚШ етакчиларининг “C5+1” форматидаги биринчи саммити бўлиб ўтди. Шавкат Мирзиёев ва АҚШ президенти Жозеф Байден икки томонлама учрашувда давлатлараро ва минтақавий ҳамкорликнинг долзарб масалаларини кўриб чиқди.
Бундан ташқари, давлат раҳбари Европа кенгаши президенти Шарл Мишел, Корея президенти Юн Сок Ёл, Покистон бош вазири вазифасини бажарувчи Анвар Какар, шунингдек, нуфузли халқаро тузилмалар раҳбарлари — БМТ Бош котиби Антониу Гутерриш, Халқаро валюта фонди бошқарувчи директори Кристалина Георгиева, Жаҳон савдо ташкилоти бош директори Нгози Оконжо-Ивеала, Жаҳон банки гуруҳи президенти Аджай Банга, ФИФА президенти Жанни Инфантино билан музокаралар ўтказди.
Президент матбуот хизмати хабарида таъкидланишича, ташрифнинг ишбилармонлик дастури ҳам воқеаларга бой бўлди. Ўзбекистон етакчиси АҚШ бизнеси вакилларининг Ўзбекистон—Америка савдо палатаси раиси Керолин Лемм бошчилигидаги делегацияси ҳамда йирик трансмиллий компания ва корпорациялар — Air Products, Citigroup, SNH, Boston Consulting Group, GЕ HealthCare, Oppenheimer, Cerberus, Cintana раҳбарлари билан учрашди.
Ташриф дастуридаги тадбирлар якунлангач, Шавкат Мирзиёев Тошкентга қайтиб келди.
Изоҳ (0)