Toshkentda 55 yoshli erkak ko‘p qavatli uy podyezdida 7 yoshli qizga tegajog‘lik qilgani haqida xabar berilgan edi. Zo‘ravonlikka qarshi kurashuvchi “Nemolchi.uz” loyihasining ma’lum qilishicha, u 18 yilga ozodlikdan mahrum qilindi.
Voqea iyun oyida, Mirzo Ulug‘bek tumanidagi ko‘p qavatli uy podyezdida sodir bo‘lgandi. Erkak 7 yoshli qizning ketidan podyezdga kirib, uni qo‘rqitib, intim xarakterdagi harakatlarni sodir eta boshlagan. Ushbu hujum uy aholisi tomonidan o‘rnatilgan kameralar tomonidan qayd etilgan.
Qiz ota-onasiga bo‘lgan voqeani darhol aytib berib, ular zudlik bilan huquq-tartibot idoralariga murojaat qilgan. Erkak 24 soat ichida hibsga olingan. Ma’lum bo‘lishicha, u ilgari voyaga yetmaganlarga nisbatan uyatsiz xatti-harakatlari uchun jinoiy javobgarlikka tortilgan.
20-sentabr kuni Jinoyat ishlari bo‘yicha Mirzo Ulug‘bek tuman sudi 1968-yilda tug‘ilgan ushbu erkak — X.A.ni Jinoyat kodeksi 119-modda (jinsiy ehtiyojni zo‘rlik ishlatib g‘ayritabiiy usulda qondirish) 4-qismida nazarda tutilgan jinoyatni sodir etganlikda aybdor deb topib, 18 yilga ozodlikdan mahrum qildi.
“Nemolchi” loyihasining yozishicha, sud majlisida ayblanuvchi ishini oxiriga yetkazmaganini vaj qilgan.
Eslatib o‘tamiz, Oliy sud plenumining nomusga tegishga doir ishlar bo‘yicha sud amaliyoti to‘g‘risidagi qarori 8-bandiga ko‘ra, nomusga tegish yoki jinsiy ehtiyojni g‘ayritabiiy usulda qondirish jinoyati tegishli jinoyat tarkibining obyektiv tomoni sifatida nazarda tutilgan jinsiy aloqa yoki jinsiy ehtiyojni g‘ayritabiiy usulda qondirishga qaratilgan harakatlar boshlangan paytdan, ular tugatilganligidan va kelib chiqqan oqibatlardan qat’i nazar, tamom bo‘lgan hisoblanadi.
Izoh (0)