Prezident qarori bilan yana yettita shaharda “Xalq nazorati” platformasi ishga tushirilishi haqida xabar berilgan edi. Joylarda jamoatchilik nazoratini yo‘lga qo‘yishda “Xalq nazorati” platformasi faoliyatini tashkil etish to‘g‘risida hukumat qarori loyihasi jamoatchilik muhokamasi uchun e’lon qilindi.
Unga ko‘ra, 2023-yil dekabgacha “Xalq nazorati” platformasi:
- birinchi bosqichda — Angren, Ohangaron, Yangiyo‘l, Chirchiq va Nurafshon shaharlarida;
- ikkinchi bosqichda — Jizzax va Urganch shaharlarida ishga tushirilishi taʼminlanadi.
Buning natijasida aholi muammolarini hal qilishning yangi mexanizmi yaratilishiga va kommunal xo‘jalik infratuzilmasiga ajratiladigan budjet mablag‘larining manzilli sarflanishiga erishiladi.
“Xalq nazorati” platformasi doirasida loyiha ofislari tashkil etiladi. Bunda tuman va shaharlarda platforma orqali kelib tushgan xabarlarni yo‘naltirish uchun 1 tadan masʼul tayinlanadi.
2024-yil oktabr oyidan boshlab aholiga vaqtinchalik noqulaylik keltirib chiqaruvchi holatlar, xususan, kommunikatsiya tarmoqlaridagi profilaktika ishlari yoki taʼmirlanishi sababli kommunal xizmatlarning (suv, tabiiy gaz, elektr enargiyasi) to‘xtatilishi va boshqa noqulaylik holatlarini “Xalq nazorati” platformasida avvaldan eʼlon qilib borish tartibi yo‘lga qo‘yiladi.
Ushbu platformaga kelib tushayotgan xabarlarni bartaraf etilishi natijalaridan kelib chiqib mahalliy hokimliklar (tuman, shahar, viloyat) va tegishli tashkilotlarning reytingini tuzish metodologiyasi ishlab chiqiladi. Buning natijasida mutasaddi tashkilotlar va mansabdorlarning ish samaradorligini obyektiv baholash mexanizmi yaratiladi.
Platformaga kelib tushgan xabarlarning ko‘rib chiqilishi va muammolarning hal etilishi holati yuzasidan mahalliy hokimliklar (tuman, shahar, viloyat) va tegishli tashkilotlar rahbarlarining har yarim yilda Xalq deputatlari mahalliy kengashlarida hisobot berishi tartibi joriy qilinadi.
Hisobot natijalaridan kelib chiqib Xalq deputatlari mahalliy kengashlari qarorlari asosida mahalliy hokimliklar (tuman, shahar, viloyat) va tegishli tashkilotlar rahbar va rahbar o‘rinbosarlarini rag‘batlantirish (oylik ish haqi fondining uch baravarigacha miqdorigacha) yoki ularga nisbatan javobgarlik choralarini ko‘rish bo‘yicha qarorlar qabul qilinadi.
Buning natijasida mansabdor shaxslar va tashkilotlarning masʼuliyatini oshirish, muammolarga “panja ortidan qarash” munosabatini bartaraf qilish imkoniyati yaratiladi.
Shuningdek, har yarim yilda muammoning bartaraf etilishi aholi turmush tarzining yaxshilanishiga salmoqli hissa qo‘shgan dolzarb muammolarni ko‘tarib chiqishda faol bo‘lgan fuqarolarni mahalliy budjetning qo‘shimcha manbalari hisobidan rag‘batlantirish choralari ko‘riladi.
Ushbu hujjat loyihasi muhokamasi 29-sentabrgacha davom etadi.
Izoh (0)