Президент қарори билан яна еттита шаҳарда “Халқ назорати” платформаси ишга туширилиши ҳақида хабар берилган эди. Жойларда жамоатчилик назоратини йўлга қўйишда “Халқ назорати” платформаси фаолиятини ташкил этиш тўғрисида ҳукумат қарори лойиҳаси жамоатчилик муҳокамаси учун эълон қилинди.
Унга кўра, 2023 йил декабгача “Халқ назорати” платформаси:
- биринчи босқичда — Ангрен, Оҳангарон, Янгийўл, Чирчиқ ва Нурафшон шаҳарларида;
- иккинчи босқичда — Жиззах ва Урганч шаҳарларида ишга туширилиши таъминланади.
Бунинг натижасида аҳоли муаммоларини ҳал қилишнинг янги механизми яратилишига ва коммунал хўжалик инфратузилмасига ажратиладиган бюджет маблағларининг манзилли сарфланишига эришилади.
“Халқ назорати” платформаси доирасида лойиҳа офислари ташкил этилади. Бунда туман ва шаҳарларда платформа орқали келиб тушган хабарларни йўналтириш учун 1 тадан масъул тайинланади.
2024 йил октябрь ойидан бошлаб аҳолига вақтинчалик ноқулайлик келтириб чиқарувчи ҳолатлар, хусусан, коммуникация тармоқларидаги профилактика ишлари ёки таъмирланиши сабабли коммунал хизматларнинг (сув, табиий газ, электр энаргияси) тўхтатилиши ва бошқа ноқулайлик ҳолатларини “Халқ назорати” платформасида аввалдан эълон қилиб бориш тартиби йўлга қўйилади.
Ушбу платформага келиб тушаётган хабарларни бартараф этилиши натижаларидан келиб чиқиб маҳаллий ҳокимликлар (туман, шаҳар, вилоят) ва тегишли ташкилотларнинг рейтингини тузиш методологияси ишлаб чиқилади. Бунинг натижасида мутасадди ташкилотлар ва мансабдорларнинг иш самарадорлигини объектив баҳолаш механизми яратилади.
Платформага келиб тушган хабарларнинг кўриб чиқилиши ва муаммоларнинг ҳал этилиши ҳолати юзасидан маҳаллий ҳокимликлар (туман, шаҳар, вилоят) ва тегишли ташкилотлар раҳбарларининг ҳар ярим йилда Халқ депутатлари маҳаллий кенгашларида ҳисобот бериши тартиби жорий қилинади.
Ҳисобот натижаларидан келиб чиқиб Халқ депутатлари маҳаллий кенгашлари қарорлари асосида маҳаллий ҳокимликлар (туман, шаҳар, вилоят) ва тегишли ташкилотлар раҳбар ва раҳбар ўринбосарларини рағбатлантириш (ойлик иш ҳақи фондининг уч бараваригача миқдоригача) ёки уларга нисбатан жавобгарлик чораларини кўриш бўйича қарорлар қабул қилинади.
Бунинг натижасида мансабдор шахслар ва ташкилотларнинг масъулиятини ошириш, муаммоларга “панжа ортидан қараш” муносабатини бартараф қилиш имконияти яратилади.
Шунингдек, ҳар ярим йилда муаммонинг бартараф этилиши аҳоли турмуш тарзининг яхшиланишига салмоқли ҳисса қўшган долзарб муаммоларни кўтариб чиқишда фаол бўлган фуқароларни маҳаллий бюджетнинг қўшимча манбалари ҳисобидан рағбатлантириш чоралари кўрилади.
Ушбу ҳужжат лойиҳаси муҳокамаси 29 сентябргача давом этади.
Изоҳ (0)