“Daryo”da Toshkent shahrining Yashnobod tumanida 9 ta xonadonni 39 kishiga pullagan MCHJ rahbarining qilmishlari hikoya qilingandi. Shundan so‘ng Bosh prokuratura holat yuzasidan tergovga qadar tekshiruv boshlanganini ochiqladi. Bosh prokuraturaning qo‘shimcha qilishicha, o‘rganishlardan so‘ng mazkur ish bo‘yicha jinoyat ishi qo‘zg‘atilgan.
Yashnobod tumanidagi uy-joy bilan bog‘liq firibgarlik sodir qilingani haqidagi maqolada ko‘rsatilgan holatlar yuzasidan tergovga qadar tekshiruv harakatlari o‘tkazildi. Aniqlanishicha, “Z.G.” MCHJ rahbari A.A. xonadon sotib olish istagini bildirgan 23 nafar fuqaro bilan soxta oldi-sotdi shartnomalari tuzib, fuqarolarning jami 4 milliard so‘mdan ortiq pul mablag‘larini firibgarlik yo‘li bilan qo‘lga kiritgan. Qurilishni tugatmasdan, xonadonlarni fuqarolarga rasmiylashtirib bermasdan, o‘zganing juda ko‘p miqdordagi pul mablag‘larini talon-toroj qilgan, — deyiladi Bosh prokuratura axborotida.
Qo‘shimcha qilinishicha, mazkur holat yuzasidan Jinoyat kodeksining 168-moddasi (firibgarlik) va boshqa moddalar bilan jinoyat ishi qo‘zg‘atilib, dastlabki tergov harakatlarini olib borish uchun ichki ishlar organiga yuborilgan.
Bosh prokuratura axborot xizmati rahbari Hayot Shamsutdinovning “Daryo”ga aniqlashtirishicha, dastlabki tergov harakatlarini Yashnobod tuman IIB olib boradi.
Eslatib o‘tamiz, Zohmir Group nomli qurilish kompaniyasi shaharning Yashnobod tumanidagi yangi qurilayotgan 9 ta xonadondan iborat uch qavatli uylarini 39 nafar fuqaroga pullagan.
Qurilish tashkiloti bizga va’da qilgan uylarni 2022-yilning may—iyun oyida topshirishi kerak edi. Lekin 2023-yil keldi hamki, uy qurilishi qanday holatda bo‘lsa, shunday turibdi. Hech narsa o‘zgarmagan. Biz aytilgan muddatdan o‘tgach, quruvchidan uyimiz qani, qachon tayyor bo‘ladi, deb so‘raganimizdan so‘ng, boshqa qiziq-qiziq muammolar paydo bo‘lmoqda. Aniqlanishicha, bizga sotilgan uylar yana 4-5 kishiga sotilgan ekan, — degandi “Daryo” jurnalisti bilan suhbatlashgan murojaatchilar.
Izoh (0)