Chirchiq shahridagi yer auksionda 23 baravar qimmatga sotildi

20-iyun kuni o‘tkazilgan onlayn auksion savdolarida bir nechta lotlar sotuvi bo‘lib o‘tdi. Bu haqda “E-auksion” matbuot xizmati xabar bermoqda.  

Bir kunlik savdolar natijasida boshlang‘ich narxi 24,2 mlrd so‘m bo‘lgan 944 ta savdo obyekti 44,9 mlrd so‘mga realizatsiya qilindi. 

14 ta davlat aktivi sotilgan bo‘lsa, 93 tasi ijaraga berildi. 262 ta tadbirkorlik uchun yer uchastkalari sotildi.

Bular orasida Chirchiq shahridagi boshlang‘ich narxi 26,3 mln so‘m bo‘lgan 0,21 gektar yer uchastkasi maktabgacha ta’lim muassasasi qurish uchun ijara huquqi bilan 620,9 mln so‘m taklif berildi. Shu tariqa mazkur lot boshlang‘ich narxiga nisbatan 23,6 barobar qimmatroqqa sotildi. 

Bundan tashqari Toshkent shahar, Chilonzor tumanidan yillik ijara stavkasi 10,9 mln so‘m bo‘lgan Respublika olimpiya va paralimpiya zaxiralari kollejining bo‘sh turgan bino qismi uchun 168,6 mln so‘mga taklif berildi.

Buxoro viloyati, Buxoro tumanidan boshlang‘ich narxi 60,3 mln so‘m bo‘lgan 0,041 gektar yer uchastkasi ko‘p qavatli uy-joy qurish uchun ijara huquqi bilan 638,7 mln so‘mga sotildi.

Toshkent viloyati, Olmaliq shahridan narxi 7,2 mlrd so‘m bo‘lgan 4,97 gektar yer uchastkasi klinikalar, dispanserlar, dorixonalar qurish uchun mulk huquqi bilan 8 mlrd so‘mga sotildi.

Avvalroq Farg‘onadagi qurilishi tugallanmagan mehmonxona MIB tomonidan 16,7 mlrd so‘mga auksionga qo‘yilgani haqida xabar berilgandi.