Xitoyda sud XXR sobiq adliya vaziri, jamoat xavfsizligi vaziri sobiq o‘rinbosari Fu Chjenxuani ikki yil muhlat bilan o‘lim jazosiga hukm qildi. Bu haqda National Business Daily gazetasi xabar bermoqda. Fu Chjenxua Pekin Jamoat xavfsizligi boshqarmasi boshlig‘i bo‘lgan, keyin 2013-yildan 2018-yilgacha jamoat xavfsizligi vaziri o‘rinbosari bo‘lib ishlagan. 2018-yilda esa u adliya vaziri etib tayinlangan va shu lavozimda 2020-yilgacha qolgan.
Tergov ma’lumotlariga ko‘ra, sobiq mansabdor 2005—2021-yillar davomida o‘z xizmat vakolatlarini suiiste’mol qilib, poralar olgan va alohida shaxslarga biznes yuritishda homiylik qilgan. Sud aniqlashicha, sobiq amaldor jami 117 million yuan (qariyb 16,5 million dollar) miqdorida poralar olgan. Bundan tashqari, u “o‘z ukasi Fu Veyxuaning ehtimoliy og‘ir jinoyatlari dalillarini yashirgan”, deyiladi xabarda.
Fu Chjenxuaning o‘zi aybiga iqror bo‘ldi. Sud uni ikki yillik muhlat bilan o‘lim jazosiga mahkum qildi. Agar shu ikki yil ichida mahkum qasddan boshqa jinoyat sodir etmasa, muhlat tugaganidan keyin o‘lim jazosi umrbod qamoq jazosiga, ayrim hollarda esa 15—20 yillik muddatga o‘zgartirilishi mumkin.
“RIA Novosti” qayd etishicha, so‘nggi bir necha yillar ichida bir yo‘la bir nechta jamoat xavfsizligi vaziri o‘rinbosarlari korrupsiyaviy jinoyatlar tufayli sud ta’qibiga uchragan. Chunonchi, Li Dunshen 15 yilga ozodlikdan mahrum etilgan, “Interpol” sobiq rahbari Men Xunvey 13,5 yilga qamalgan, Sun Litszyun esa o‘z ishi bo‘yicha qarorni kutmoqda.
Izoh (0)