Futbol bo‘yicha U-23 Osiyo Kubogi saralash bosqichi doirasida O‘zbekiston OTJ 12-sentabr, seshanba kuni Eronga qarshi bahs olib bordi.
Uchrashuvning birinchi bo‘limida darvozalar ishg‘ol etilmadi. Ikkinchi bo‘lim boshida esa o‘zbekistonliklar hisobni ochdi. 47-daqiqada Abbosbek Fayzullayev ajoyib uzatmani golga aylantirdi. Ushbu gol o‘yin yakuniga qadar yagonaligicha qoldi va Timur Kapadze jamoasiga g‘alaba keltirdi.
Shu tariqa O‘zbekiston Olimpiya terma jamoasi guruh bosqichidagi uchala uchrashuvni ham g‘alaba bilan yakunladi. Qayd etib o‘tish joiz, O‘zbekiston 1-turda Afg‘oniston ustidan 8:1 hisobida zafar quchgandi. 2-turda Gongkong darvozasiga javobsiz 10 ta gol urgandi.
O‘zbekiston OTJ ishtirok etadigan 2024-yilning aprel oyida Qatarda bo‘lib o‘tadigan Osiyo Kubogi musobaqasida Parij—2024 Olimpiadasi yo‘llanmasi o‘ynaladi.
Eslatib o‘tamiz, O‘zbekistondan tashqari Janubiy Koreya, Vyetnam, BAA, Tailand va Indoneziya guruh g‘olibi sifatida yo‘llanmani qo‘lga kiritgan.
Osiyo Kubogi saralashi
12-sentabr, seshanba
O‘zbekiston U-23 – Eron U-23 1:0
Gol: 1:0 — 47 Fayzullayev.
Izoh (0)