O‘zbekiston qishloq xo‘jaligi vaziri Aziz Voitov Samarqand shahrida 7—8-sentabr kunlari bo‘lib o‘tadigan Oziq-ovqat xavfsizligiga bag‘ishlangan xalqaro konferensiya yuzasidan ommaviy axborot vositalariga maʼlumot berdi. Bu haqda “Daryo” muxbiri xabar bermoqda.
Barchangizga maʼlumki, oziq-ovqat xavfsizligi eng dolzarb global muammolardan biri bo‘lib, butun jahon mamlakatlarining hukumatlari bu masalaning yechimi ustida bosh qotirmoqda. Oziq-ovqat mahsulotlarini yetishtirish va ularni taqsimlashda mavjud yondashuvlar va qarashlarni tubdan o‘zgartirish lozimligi, eng yuqori minbarlardan, jumladan, BMT va uning Oziq-ovqat va qishloq xo‘jaligi tashkiloti (FAO) tomonidan bot-bot taʼkidlanmoqda. Bu bejiz emas. Chunki, olimlarning taʼkidlashicha, oqilona foydalanish yo‘lga qo‘yilsa, mavjud qishloq, o‘rmon va baliqchilik xo‘jaliklari insoniyatni oziq-ovqat bilan to‘liq taʼminlash va aholi uchun risoladagidek daromad manbaini yaratib berishga qodir.
Afsuski, tabiatga befarq munosabat, unga antropogen taʼsirning kuchayib borishi, isrofgarchilik, ilg‘or va rivojlanayotgan davlatlar o‘rtasidagi oziq-ovqat balansi bo‘yicha farqning o‘sayotgani, iqlim o‘zgarishlari qator salbiy omillarni keltirib chiqaryapti. Tabiiy noz-neʼmatlar, chuchuk suv, dengizlar, o‘rmonlar, biologik xilma-xillik keskin surʼatlarda kamayib bormoqda, yer unumdorligi pasayib, tuproq degradatsiyaga uchramoqda.
Oqibatda insoniyatga to‘yib ovqat yemaslik, ochlik, aholi turmush tarzining yomonlashuvi kabi ayanchli xatarlar tahdid solmoqda. BMT maʼlumotlariga ko‘ra, 2050-yilga kelib jahondagi ochlar soni 2 mlrd kishiga yetadi. Bolalar o‘rtasidagi to‘yib ovqat yemaslik tufayli ro‘y berayotgan o‘lim ko‘rsatkichlari ham dahshatli raqamlarni namoyon etmoqda.
Shu bois BMTning Oziq-ovqat va qishloq xo‘jaligi tashkiloti (FAO) va O‘zbekiston Qishloq xo‘jaligi vazirligi hamkorligida o‘tkaziladigan ushbu konferensiyada dunyoning 32 ta mamlakatidan 2 ming 330 nafar xorijiy ekspertlar, jumladan, 623 nafar xorijiy mehmon, 150 dan ortiq chet ellik olim, 148 nafar mansabdor shaxs, 130 nafar xalqaro tashkilotlar vakillari (61 nafar FAO xodimi), 46 nafar oliy o‘quv yurtlari vakillari va boshqalar ishtirok etmoqda.
Bu O‘zbekistonda ilk marotaba 15 nafar vazir va 9 nafar vazir o‘rinbosari, 30 dan ortiq xalqaro tashkilotlar va turli mamlakatlarning 8 nafar diplomat vakili ishtirokida tashkil etilgan xalqaro tadbir ekani bilan ahamiyatli. Zero, O‘zbekiston Respublikasi prezidenti tashabbusi hamda Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO)ning texnik ko‘magi asosida tashkil etilgan konferensiya kun tartibidan:
- xalqaro oziq-ovqat xavfsizligi standartlari;
- oziq-ovqat xavfsizligini monitoring qilishning yagona tizimi;
- elektron savdo oziq-ovqat balansi;
- qishloq xo‘jaligida ishlab chiqarishni monitoring qilish tizimlari;
- ekologiya va oziq-ovqat xavfsizligining dolzarb masalalari;
- oziq-ovqat xavfsizligini taʼminlashning barcha yo‘nalishlari bo‘yicha 8 ta texnik sessiyalar;
- 2030-yilgacha ochlikni yo‘q qilish, barqaror qishloq xo‘jaligini rivojlantirishda aniq vazifalarni o‘z ichiga olgan “Nol ochlik”ka erishish bo‘yicha chora-tadbirlarni amalga oshirish masalalari o‘rin olgan.
Mazkur nufuzli tadbirni yuqori saviyada o‘tkazish uchun O‘zbekiston Qishloq xo‘jaligi vazirligi va yurtimizdagi tegishli idora va tashkilotlar tomonidan barcha tayyorgarlik ishlari amalga oshirildi.
O‘ylaymanki, o‘tkazilayotgan ushbu tadbir unda ko‘tarilayotgan mavzularning dolzarbligi va aniq yechimlarning ishlab chiqilishi bilan nafaqat yurtimizda balki, dunyo miqyosida oziq-ovqat xavfsizligini taʼminlash borasida muhim ahamiyatga ega bo‘ladi.
Aziz Voitov, O‘zbekiston qishloq xo‘jaligi vaziri
Izoh (0)