Ўзбекистон қишлоқ хўжалиги вазири Азиз Воитов Самарқанд шаҳрида 7—8 сентябрь кунлари бўлиб ўтадиган Озиқ-овқат хавфсизлигига бағишланган халқаро конференция юзасидан оммавий ахборот воситаларига маълумот берди. Бу ҳақда “Дарё” мухбири хабар бермоқда.
Барчангизга маълумки, озиқ-овқат хавфсизлиги энг долзарб глобал муаммолардан бири бўлиб, бутун жаҳон мамлакатларининг ҳукуматлари бу масаланинг ечими устида бош қотирмоқда. Озиқ-овқат маҳсулотларини етиштириш ва уларни тақсимлашда мавжуд ёндашувлар ва қарашларни тубдан ўзгартириш лозимлиги, энг юқори минбарлардан, жумладан, БМТ ва унинг Озиқ-овқат ва қишлоқ хўжалиги ташкилоти (FAO) томонидан бот-бот таъкидланмоқда. Бу бежиз эмас. Чунки, олимларнинг таъкидлашича, оқилона фойдаланиш йўлга қўйилса, мавжуд қишлоқ, ўрмон ва балиқчилик хўжаликлари инсониятни озиқ-овқат билан тўлиқ таъминлаш ва аҳоли учун рисоладагидек даромад манбаини яратиб беришга қодир.
Афсуски, табиатга бефарқ муносабат, унга антропоген таъсирнинг кучайиб бориши, исрофгарчилик, илғор ва ривожланаётган давлатлар ўртасидаги озиқ-овқат баланси бўйича фарқнинг ўсаётгани, иқлим ўзгаришлари қатор салбий омилларни келтириб чиқаряпти. Табиий ноз-неъматлар, чучук сув, денгизлар, ўрмонлар, биологик хилма-хиллик кескин суръатларда камайиб бормоқда, ер унумдорлиги пасайиб, тупроқ деградацияга учрамоқда.
Оқибатда инсониятга тўйиб овқат емаслик, очлик, аҳоли турмуш тарзининг ёмонлашуви каби аянчли хатарлар таҳдид солмоқда. БМТ маълумотларига кўра, 2050 йилга келиб жаҳондаги очлар сони 2 млрд кишига етади. Болалар ўртасидаги тўйиб овқат емаслик туфайли рўй бераётган ўлим кўрсаткичлари ҳам даҳшатли рақамларни намоён этмоқда.
Шу боис БМТнинг Озиқ-овқат ва қишлоқ хўжалиги ташкилоти (FAO) ва Ўзбекистон Қишлоқ хўжалиги вазирлиги ҳамкорлигида ўтказиладиган ушбу конференцияда дунёнинг 32 та мамлакатидан 2 минг 330 нафар хорижий экспертлар, жумладан, 623 нафар хорижий меҳмон, 150 дан ортиқ чет эллик олим, 148 нафар мансабдор шахс, 130 нафар халқаро ташкилотлар вакиллари (61 нафар FAO ходими), 46 нафар олий ўқув юртлари вакиллари ва бошқалар иштирок этмоқда.
Бу Ўзбекистонда илк маротаба 15 нафар вазир ва 9 нафар вазир ўринбосари, 30 дан ортиқ халқаро ташкилотлар ва турли мамлакатларнинг 8 нафар дипломат вакили иштирокида ташкил этилган халқаро тадбир экани билан аҳамиятли. Зеро, Ўзбекистон Республикаси президенти ташаббуси ҳамда Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (FAO)нинг техник кўмаги асосида ташкил этилган конференция кун тартибидан:
- халқаро озиқ-овқат хавфсизлиги стандартлари;
- озиқ-овқат хавфсизлигини мониторинг қилишнинг ягона тизими;
- электрон савдо озиқ-овқат баланси;
- қишлоқ хўжалигида ишлаб чиқаришни мониторинг қилиш тизимлари;
- экология ва озиқ-овқат хавфсизлигининг долзарб масалалари;
- озиқ-овқат хавфсизлигини таъминлашнинг барча йўналишлари бўйича 8 та техник сессиялар;
- 2030 йилгача очликни йўқ қилиш, барқарор қишлоқ хўжалигини ривожлантиришда аниқ вазифаларни ўз ичига олган “Нол очлик”ка эришиш бўйича чора-тадбирларни амалга ошириш масалалари ўрин олган.
Мазкур нуфузли тадбирни юқори савияда ўтказиш учун Ўзбекистон Қишлоқ хўжалиги вазирлиги ва юртимиздаги тегишли идора ва ташкилотлар томонидан барча тайёргарлик ишлари амалга оширилди.
Ўйлайманки, ўтказилаётган ушбу тадбир унда кўтарилаётган мавзуларнинг долзарблиги ва аниқ ечимларнинг ишлаб чиқилиши билан нафақат юртимизда балки, дунё миқёсида озиқ-овқат хавфсизлигини таъминлаш борасида муҳим аҳамиятга эга бўлади.
Азиз Воитов, Ўзбекистон қишлоқ хўжалиги вазири
Изоҳ (0)