“Кўчмас мулкка бўлган ҳуқуқларни давлат рўйхатидан ўтказиш вақтида юзага келадиган низоларни судга қадар ҳал қилиш тартиби тўғрисидаги низомни тасдиқлаш ҳақида”ги Вазирлар Маҳкамаси қарори қабул қилинди.
Ҳужжатга кўра, кўчмас мулкка бўлган ҳуқуқларни давлат рўйхатидан ўтказишда Давлат кадастрлари палатаси ходимларининг ҳаракатлари (ҳаракатсизлиги)дан норози шахс тегишли низоларни кўриб чиқувчи Комиссияга ёзма Палата сайти орқали электрон мурожаат қилиши мумкин.
Палатанинг ҳудудий бошқармаси бошлиғи Комиссия раиси ҳисобланади. Комиссия таркибига унинг ўринбосари, шунингдек, қуйидаги идоралар ҳудудий бошқармаларининг вакиллари киради:
- Қурилиш вазирлиги;
- Адлия органлари;
- Солиқ органлари;
- Адвокатлар палатаси.
Мурожаатни кўриб чиқиш муддати – 10 иш куни. Комиссия қароридан норози шахс қарорни олган пайтдан 2 ой ичида Апелляция комиссиясига мурожаат қилиши мумкин.
Ҳужжат қонун ҳужжатлари маълумотлари миллий базасида эълон қилинган ва 2023 йил 30 августдан кучга кирган.
Бундан олдин Ўзбекистонда кўчмас мулкка бўлган ҳуқуқларни давлат рўйхатидан ўтказувчиларнинг малакасини ошириш тартиби белгиланганди. Ушбу ўқув курсларининг энг кўп ҳажми 72 соатни ташкил қилади. Курслар тамомлангач, рўйхатдан ўтказувчилар тест синовидан ўтказилиб, тестдан муваффақиятли ўтганларга сертификат берилади.
Изоҳ (0)