Prezident Shavkat Mirziyoyevning Qashqadaryo viloyatiga tashriflarining birida o‘tkazilgan yig‘ilishda Dehqonobod tumani hokimi Zoir Aliqulov rahbarligidagi tuman viloyat markazidan olis va borish qiyin bo‘lgan hududda joylashganligini aytib, aholiga qulaylik yaratish maqsadida yo‘l infratuzilmasini yaxshilash niyati borligini, buning uchun esa tumanga maxsus yo‘l qurilish texnikalari ajratilishida respublika ko‘magiga muhtojligini aytib, prezidentdan ko‘mak so‘ragan.
Davlat rahbari tashrifidan ko‘p o‘tmay tuman hokimi so‘ragan ko‘mak respublika budjeti mablag‘lari evaziga xarid qilinib, Dehqonobodga olib kelingan. Hamda tuman hokimi boshchiligidagi sektor rahbarlariga topshirilgan. Hozirda prezident topshirig‘iga ko‘ra berilgan 4 ta maxsus yo‘l qurilishi texnikalari yordamida tumandagi tuproq yo‘llar shag‘allashtirilmoqda. Bu haqda “Daryo”ga hokimlik axborot xizmati xabar berdi.
Qayd etilishicha, mazkur texnikalar yordamida hozirgi kungacha 12 ta mahalladagi 82 kilometr tuproq yo‘llar hashar yo‘li bilan shag‘allashtirilgan.
Texnikalar uchun bir kilometr yo‘lga o‘rtacha 800 litr yonilg‘i sarflanmoqda. Bu esa 12 million 480 ming so‘m mablag‘ degani. Agar mazkur yo‘llar davlat dasturi asosida shag‘allashtirilganda 1 kilometr yo‘lga 85 million so‘m pul mablag‘i xarj qilinar edi. Hozirda 82 kilometr yo‘lni hashar yo‘li bilan shag‘allashtirish uchun 1 milliard 23 million sarflangan bo‘lsa, davlat dasturi asosida bajarilgan ishlar uchun 6 milliard 970 million sarf qilinar edi. Hashar yo‘li orqali bajarilgan ishlar evaziga hozirgacha 5 milliard 946 million so‘m iqtisod qilindi.
Yil yakunigacha 130 kilometr ichki yo‘llarni shag‘allashtirish rejalashtirilgan bo‘lib, jami 8 milliard 702 million so‘m tejab qolinishiga erishiladi. Hozirgi kungacha 82 kilometr yo‘lni hashar yo‘li bilan ta’mirlash natijasida 12 ta mahalladagi 53 ming aholiga qulaylik yaratilishi hamda 237 ta murojaatlarning ijobiy hal etilishiga erishildi, — deydi bu haqda gapirgan tuman hokimi Zoir Aliqulov.
Tuman hokimligi axborot xizmatining qo‘shimcha qilishicha, ushbu texnikalar yordamida hududdagi sel suvlari yo‘lida ko‘priklar ham qurilib, aholining mushkuli oson qilinmoqda.
Tumanda o‘tgan yetti yil davomida 74 ta ko‘prik qurilib, aholi foydalanishi uchun topshirildi. Bu ko‘priklar asosan sel suvi yo‘llarida qurilgan bo‘lib, barchasi aholi murojaatlariga ko‘ra, ularning talabidan kelib chiqqan holda qurib bitkazilgan. Yaqin kunlarda tumanning “Bozortepa” mahallasi hududidagi “Chuqur” qishlog‘iga olib o‘tuvchi soylikdagi ko‘prik ham hashar yo‘li bilan qurilib, ishga tushish arafasida, — deydi tuman hokimi Zoir Aliqulov.
Izoh (0)