Ҳоким ташаббус кўрсатди, президент қўллаб-қувватлади: Деҳқонободда тупроқ йўллар шағаллаштирилмоқда

Президент Шавкат Мирзиёевнинг Қашқадарё вилоятига ташрифларининг бирида ўтказилган йиғилишда Деҳқонобод тумани ҳокими Зоир Алиқулов раҳбарлигидаги туман вилоят марказидан олис ва бориш қийин бўлган ҳудудда жойлашганлигини айтиб, аҳолига қулайлик яратиш мақсадида йўл инфратузилмасини яхшилаш нияти борлигини, бунинг учун эса туманга махсус йўл қурилиш техникалари ажратилишида республика кўмагига муҳтожлигини айтиб, президентдан кўмак сўраган. 

Давлат раҳбари ташрифидан кўп ўтмай туман ҳокими сўраган кўмак республика бюджети маблағлари эвазига харид қилиниб, Деҳқонободга олиб келинган. Ҳамда туман ҳокими бошчилигидаги сектор раҳбарларига топширилган. Ҳозирда президент топшириғига кўра берилган 4 та махсус йўл қурилиши техникалари ёрдамида тумандаги тупроқ йўллар шағаллаштирилмоқда. Бу ҳақда “Дарё”га ҳокимлик ахборот хизмати хабар берди. 

Қайд этилишича, мазкур техникалар ёрдамида ҳозирги кунгача 12 та маҳалладаги 82 километр тупроқ йўллар ҳашар йўли билан шағаллаштирилган. 

Техникалар учун бир километр йўлга ўртача 800 литр ёнилғи сарфланмоқда. Бу эса 12 миллион 480 минг сўм маблағ дегани. Агар мазкур йўллар давлат дастури асосида шағаллаштирилганда 1 километр йўлга 85 миллион сўм пул маблағи харж қилинар эди. Ҳозирда 82 километр йўлни ҳашар йўли билан шағаллаштириш учун 1 миллиард 23 миллион сарфланган бўлса, давлат дастури асосида бажарилган ишлар учун 6 миллиард 970 миллион сарф қилинар эди. Ҳашар йўли орқали бажарилган ишлар эвазига ҳозиргача 5 миллиард 946 миллион сўм иқтисод қилинди. 

Йил якунигача 130 километр ички йўлларни шағаллаштириш режалаштирилган бўлиб, жами 8 миллиард 702 миллион сўм тежаб қолинишига эришилади. Ҳозирги кунгача 82 километр йўлни ҳашар йўли билан таъмирлаш натижасида 12 та маҳалладаги 53 минг аҳолига қулайлик яратилиши ҳамда 237 та мурожаатларнинг ижобий ҳал этилишига эришилди, — дейди бу ҳақда гапирган туман ҳокими Зоир Алиқулов.

Туман ҳокимлиги ахборот хизматининг қўшимча қилишича, ушбу техникалар ёрдамида ҳудуддаги сел сувлари йўлида кўприклар ҳам қурилиб, аҳолининг мушкули осон қилинмоқда.

Туманда ўтган етти йил давомида 74 та кўприк қурилиб, аҳоли фойдаланиши учун топширилди. Бу кўприклар асосан сел суви йўлларида қурилган бўлиб, барчаси аҳоли мурожаатларига кўра, уларнинг талабидан келиб чиққан ҳолда қуриб битказилган. Яқин кунларда туманнинг “Бозортепа” маҳалласи ҳудудидаги “Чуқур” қишлоғига олиб ўтувчи сойликдаги кўприк ҳам ҳашар йўли билан қурилиб, ишга тушиш арафасида, — дейди туман ҳокими Зоир Алиқулов.