Farg‘onada yangi o‘quv yili arafasida 5 ta talabalar turar joyi foydalanishga topshirildi

Farg‘onada yangi o‘quv yili boshlanishi arafasida qariyb ikki ming o‘rinli 5 ta talabalar turar joyi foydalanishga topshirildi, deb xabar bermoqda “Daryo” muxbiri Azizjon Ermatov.

Qayd etilishicha, Toshkent axborot texnologiyalari universiteti Farg‘ona filialida 400 o‘rinli, Farg‘ona davlat universitetida 3 ta jami 1154 o‘rinli va Farg‘ona politexnika institutida 520 o‘rinli talabalar turar joylarini foydalanishga topshirish marosimi bo‘lib o‘tgan.

Tadbirlarda viloyat hokimi Xayrullo Bozorov, sektor rahbarlari, oliygohlar o‘qituvchi va talabalari, keng jamoatchilik vakillari ishtirok etgan. 

Ta’kidlanishicha, yangi o‘quv yili boshlanishi arafasida Farg‘ona davlat universitetida 3 ta, Farg‘ona politexnika instituti, Qo‘qon davlat pedagogika instituti, Toshkent axborot texnologiyalari universiteti Farg‘ona filialida bittadan yangi binolar davlat-xususiy sheriklik asosida bunyod etilgan. 

Yotoqxonalarda talabalar uchun axborot-resurs markazi, ma’naviyat xonalari hamda shinam oshxonalar, kerakli barcha qulayliklar yaratilgan.

Tadbir davomida 4,5 mingga yaqin talaba tahsil olayotgan Toshkent axborot texnologiyalari universiteti Farg‘ona filialida qariyb 23,7 milliard so‘m mablag‘ evaziga barpo etilgan 400 o‘rinli yotoqxona foydalanishga topshirilgan.

Bundan tashqari, Farg‘ona davlat universitetining 59 milliard so‘m mablag‘ sarflanib bunyod etilgan 804 o‘rinli 2 ta talabalar turar joyi ham foydalanishga topshirildi. Shuningdek, universitetning byudjetdan tashqari 12,9 milliard so‘m mablag‘i hisobiga qo‘shimcha barpo etilgan 1 ta 350 o‘rinli yotoqxona binosida ham tantanali ochilish marosimi o‘tkazildi.
Farg‘ona politexnika institutida 520 o‘rinli talabalar turar joyi ramziy kaliti ham o‘z egalariga topshirildi. Mazkur binoga 25 milliard so‘m mablag‘ sarflangani ma’lum qilindi.

Ma’lumot uchun, Farg‘ona viloyatidagi 7 ta oliy ta’lim muassasalari uchun 2022—2025-yillarda 20 ta 8 ming o‘rinli yotoqxona qurilishi belgilangan. Joriy o‘quv yili davomida yana 4 ta oliy o‘quv yurtlarida 5 ta 2010 o‘rinli talabalar turar joylari qurib bitkaziladi. Shuningdek, 2024—2025-yillarda yana 8 ta yotoqxona barpo etiladi.