O‘zbekistonda tirsak bo‘g‘imi jarohatlarini endoprotez yoki plastinalar emas, balki Ilizarov usuli yordamida tabiiy yo‘l bilan tiklash amaliyoti joriy etildi. Bu haqda Sog‘liqni saqlash vazirligi axborot xizmati “Daryo”ga maʼlum qildi.
Taʼkidlanishicha, Respublika ixtisoslashtirilgan travmatologiya va ortopediya ilmiy-amaliy tibbiyot markazida ilk bor 1 yosh-u 4 oylik bolaning ortiqcha yarim tana umurtqasini olib tashlash jarrohlik amaliyoti o‘tkazildi.
“Markazda ilk bor 2 nafar bemorda oshiq suyagining avaskulyar nekrozida mozaik xondroplastika operatsiyasi, 1 nafar fuqaroda chanoq-son bo‘g‘imi endoprotezlari nostabilligida hamda suyak defektida allosuyak yordamida nuqsonlarni to‘ldirish va endoprotezlash operatsiyalari bajarildi.
Shuningdek, suyak sinishlarini davolashda bloklovchi osteosintez deb ataluvchi zamonaviy operatsiya usulidan foydalana boshlandi.
Murakkab amaliyotlar tumanlar darajasiga tushirilmoqda. Andijon viloyatida ilk bor son suyagi boshchasining aseptik nekrozida tunnelizatsiya va PRP-terapiya yuqori texnologik jarrohlik amaliyoti bajarildi”, – deyiladi vazirlik axborotida.
Qo‘shimcha qilinishicha, tug‘ma maymoqlikni Ponseti usulida muolaja qilish o‘zlashtirildi. Avvalo, u kaminvazivligi bilan ajralib turadi. Qolaversa, tuzalish muddati qisqa va eng muhimi, asoratsiz. Shu bilan birga, bemorni muolajadan so‘ng reabilitatsiya qilishga ehtiyoj yo‘q.
O‘zbekiston tibbiy amaliyotida noyob yo‘nalish — qo‘l va oyoq panjasi xirurgiyasi bo‘limi tashkil etildi.
Mavzuga doir:
- Bolalarda 50 ga yaqin buyrak ko‘chirib o‘tkazish amaliyoti bajarildi — SSV
- O‘zbekistonda qariyb 50 turdagi oftalmologik kasalliklarni davolash yo‘lga qo‘yildi — SSV
- “Faqat respublika markazida bajariladigan neyrojarrohlik amaliyotlarining qariyb 40 foizi endilikda barcha hududlarda bajarilmoqda” - SSV
Izoh (0)