“Sarmat” strategik raketa majmuasi jangovar navbatchilik holatiga o‘tkazildi. Bu haqda “Roskosmos” davlat korporatsiyasi bosh direktori Yuriy Borisov ma’lum qildi.
“Roskosmos” taqdimoti bilan tanishgan “TASS” agentligi ma’lumotlariga ko‘ra, ushbu majmua 2024-yilda jangovar navbatchilikka qo‘yilishi mo‘ljallangan.
“Sarmat” — qit’alararo ballistik raketaga ega kompleks bo‘lib, katta kuchga ega yadroviy va gipertovushli o‘q-dorilarni tashishga qodir. Raketaning e’lon qilingan start og‘irligi 200 tonnadan oshadi, parvoz uzoqligi — 18 ming kilometr. “Sarmat” sovetlarning 11 ming kilometr masofaga uchishga qodir “Voyevoda” tizimini almashtirishi kerak — u Rossiya arsenalidagi eng kuchli strategik raketadir.
“Sarmat” majmuasi Rossiya prezidenti Vladimir Putin tomonidan 2018-yilda Federal majlisga yo‘llagan murojaatida taqdim etilgan. Putinning ta’kidlashicha, uzoq parvoz masofasi “Sarmat”ga ko‘p sonli yadroviy qurolni olib yurish, shuningdek, “Shimoliy va Janubiy qutblar ustidan uchib, dunyoning istalgan nuqtasidagi nishonlarga zarba berish imkonini yaratadi”. Kompyuter taqdimoti videosida raketa Shimoliy qutb orqali Shimoliy Amerika tomon uchgan edi.
Shu bilan birga, mavjud ma’lumotlarga ko‘ra “Sarmat” atigi bir marta muvaffaqiyatli sinovdan o‘tkazilgan. 2022-yil aprel oyining oxirida, Rossiyaning Ukrainada harbiy harakatlari boshlanganidan ko‘p o‘tmay Rossiya Mudofaa vazirligi Arxangelsk viloyatidagi Plesetsk kosmodromidan “Sarmat” QBR muvaffaqiyatli uchirilganini e’lon qildi. 2023-yil fevral oyida AQSH prezidenti Jo Bayden urushning bir yilligi munosabati bilan Kiyevga tashrif buyurgan kuni Rossiya “Sarmat”ni muvaffaqiyatsiz uchirgan bo‘lishi mumkinligi ma’lum bo‘lgan edi.
Izoh (0)