Rossiya ixtiyorida hozir kamida 585 ta raketa (X-22 ni hisobga olmaganda) mavjud bo‘lib, ular 500 kilometrdan ko‘proq masofani bosib o‘tadi, mazkur raketalar yordamida Rossiya qo‘shinlari Ukrainaning turli mintaqalariga hujum qilmoqda. Bu haqda “RBK-Ukraina”ga Ukraina Mudofaa vazirligi Bosh razvedka boshqarmasi (GUR) vakili general-mayor Vadim Skibitskiy ma’lum qildi.
Uning so‘zlariga ko‘ra, GUR Rossiyaning raketa zaxiralari va ularni ishlab chiqarish bilan bog‘liq barcha harakatlarni diqqat bilan kuzatyapti.
“Iskander” ballistik va qanotli raketalari haqida gapiradigan bo‘lsak, bizdagi ma’lumotlarga ko‘ra, hozirda taxminan 270 dona qolgan. “Kalibr” zaxiralari taxminan 140 ta. X-101 raketalari nisbatan kam, shu bilan birga, X-101, X-555 va X-55 jangovar kallakli raketalarining soni, bizning hisob-kitoblarga ko‘ra, 100 ga yaqin, — dedi Skibitskiy.
Bundan tashqari, uning so‘zlariga ko‘ra, Rossiya zaxiralarida taxminan 75 dona “Kinjal” qolgan bo‘lishi mumkin.
GUR vakilining qo‘shimcha qilishicha, bugungi kunda ruslar X-101 raketalaridan o‘tgan yil kuzdagiga nisbatan kamroq foydalanmoqda. Buning ikkita sababi bor.
Aftidan, rejaga ko‘ra, rossiyaliklar oyiga 40 ga yaqin X-101 raketalarini ishlab chiqarishi mumkin, ammo biz bu rejalar bajarilmayotganini yaxshi bilamiz. Bu, birinchi navbatda, xorijiy komponentlarning yetishmasligi bilan bog‘liq. Ikkinchi omil shundaki, Rossiya ushbu raketalarni zaxiraga olishga urinmoqda. Chunki ular biz muvaffaqiyatli urib tushirgan X-555, X-22 qanotli raketalari yoki hatto “Kalibr” raketalari bilan solishtirganda aniqroq va samaraliroq, — deya tushuntirdi Skibitskiy.
Eslatib o‘tamiz, 28-avgustga o‘tar kechasi Rossiya qo‘shinlari Ukrainaning Poltava viloyatidagi sanoat obyektiga zarba berdi. Hujumda “Kalibr” qanotli raketalari va X-59 dan foydalanilgan.
Izoh (0)