Rossiyalik shoumen Maksim Galkin o‘zining Instagram’dagi sahifasida Qozog‘iston rasmiylari unga respublikada chiqish qilishni taqiqlab qo‘yganini aytdi.
Galkinning so‘zlariga ko‘ra, Qozog‘istonda uning Olmaota va Ostonadagi chiqishiga “davlat darajasida” to‘sqinlik qilinmoqda. Ijodkorning aytishicha, uning jamoasi ko‘p oylardan beri konsertlar uyushtirishga harakat qilgan, biroq doimiy ravishda rasmiylarning qarshiliklariga duch kelgan.
“Ba’zi uydirma sabablar, sahna ortidagi taqiqlar… Tushunaman, nima uchundir Qozog‘iston rasmiylarini shunchalik qo‘rqitganmanki, ular mening konsertlarimni o‘tkazishdan qattiq qo‘rqdi. Ayni paytda konsertlarimga aytilmagan taqiq bor”, — dedi u.
Maksim Galkin Rossiyada “xorijiy agent” deb e’lon qilingan. Rossiya qo‘shinlarining Ukrainaga keng ko‘lamli bosqini boshidanoq u doimiy ravishda urushga qarshi chiqdi.
Qozog‘iston urushni qo‘llab-quvvatlagan rossiyalik san’atkorlarning konsertlarini ham bekor qilmoqda. Xususan, oktabr oyida rossiyalik xonanda Grigoriy Lepsning konserti Qozog‘istonda, shuningdek, O‘zbekistonda ham bekor qilindi. Sababi rus xonandasi Rossiyaning Ukrainadagi bosqinini doimiy qo‘llab kelgan va urushni moliyalashtirishni ham boshlagan. Xususan, u Ukraina armiyasiga tegishli tankni ishdan chiqargan har bir kishiga bir million rubl to‘lashni va’da qilgan va rus askarini Leopard tankini yo‘q qilgani sabab mukofotlagandi. Ijtimoiy tarmoq faollari shu tufayli uning mamlakatda konsert berishiga keskin qarshilik ko‘rsatgan.
Izoh (0)