Мактабгача таълим ташкилоти педагогининг касбий стандартини тасдиқлаш тўғрисида Ўзбекистон Республикаси Вазирлар Маҳкамасининг қарори лойиҳаси эълон қилинди.
Унда келтирилишича, касбий стандарт “Мактабгача таълим ва тарбия тўғрисида”ги қонунига мувофиқ педагогнинг шахсий касбий фазилатлари, билими, кўникма ва малакаларига қўйиладиган асосий талабларини белгилайди.
Педагогнинг касбий стандарти ҳудудларнинг маданий, демографик ва бошқа хусусиятларини ҳисобга олган ҳолда талаблар билан тўлдирилиши мумкин.
Касбий стандарт болани ривожлантириш дастурлари, педагогика ва психологияси соҳасида тўпланган тажрибадан келиб чиққан ҳолда қуйидаги асосий тамойилларга риоя этилиши керак:
- болани сифатли парвариш қилиш, ривожлантириш ва тарбиялаш учун шароит яратиш;
- боланинг қизиқишларига мувофиқ болага қулайлик яратиш;
- ҳар бир боланинг индивидуаллигини ҳурмат қилиш, ҳамдард бўлиш, боланинг ҳис-туйғулари, фикрлари ва қадриятларини қабул қилиш;
- таълим-тарбия жараёнида боланинг ривожланишини қўллаб-қувватлаш;
- педагогларнинг инклюзивлик тамойилларини қўллаш ҳуқуқига асосланган таълимга ёндашув;
- соғлом муҳит яратувчи амалиёт ва технологияларни қўллаш;
- болалар билан мулоқот ва ижтимоий ўзаро муносабатларда мактабгача таълим ташкилоти, оила ва маҳалла ҳамкорлигини йўлга қўйиш.
Педагог қуйидаги ижтимоий кўникмалар тўпламига эга бўлиши лозим:
- ўзи таълим олиши;
- аналитик ва танқидий фикрлаш;
- тинглаш ва кузатиш қобилияти;
- чиқишимлилик, лингвистик қобилиятлар ва турли тилларда мулоқот қилиш кўникмалари;
- ҳамкорлик қилишга тайёрлик;
- низолар ва зиддиятларни ҳал қилиш қобилияти.
Белгиланган стандартлар талаблари бузилишида айбдор бўлган шахслар қонунчилик ҳужжатларида белгиланган тартибда жавоб беради.
Изоҳ (0)