Деҳқонободдаги ДХХ чегара қўшинларига қарашли ҳарбий қисмда янги боғча иш бошлади

Деҳқонобод туманининг қўшни Туркманистон билан чегарадош ҳудудида жойлашган ҳарбий қисмда қисқа муддатли мактабгача таълим ташкилоти иш бошлади. Бу ҳақда “Дарё”га туман ҳокимлиги ахборот хизмати хабар берди. 

 

 

Таъкидланишича, мазкур ташаббус ҳукуматнинг “Ўзбекистон Республикаси Давлат хавфсизлик хизмати Чегара қўшинларида давлат мактабгача таълим ташкилоти фаолиятини йўлга қўйиш тўғрисида”ги қарори асосида илгари сурилган бўлиб, жойлардаги ҳарбий шаҳарчаларда худди шундай қисқа муддатли мактабгача таълим ташкилотлари фаолият бошламоқда. 

 

 

Мазкур қарор ижроси юзасидан Деҳқонобод туманининг қўшни Туркманистон давлати билан чегарадош бўлган “Торқопчуғай” маҳалласининг Бўзтепа қишлоғида жойлашган ҳарбий қисмда ҳам қисқа муддатли замонавий типда жиҳозланган мактабгача таълим ташкилоти иш бошлади. Бугун туман ҳокими Зоир Алиқулов, туман прокурори Отабек Усанов, туман ИИБ бошлиғи Ғайрат Ҳайдаров ҳамда тегишли ташкилот раҳбарлари иштирок этган тадбирда боғчанинг расмий очилиш маросими ўтказилди, — дейди ҳокимлик ахборот хизмати ходими. 

 

 

Таъкидланишича, боғча очилишида ҳарбий хизматчиларнинг фарзандларига туман ҳокими томонидан совғалар улашилган.

Ҳарбий хизматчиларнинг фарзандларини ижтимоий ҳимоя қилиш, турмуш ўртоқларининг бандлик масалаларини ҳал қилишда ушбу янги муассасанинг барпо қилиниши айни муддао бўлди. Сабаби, мактабгача таълим ташкилоти фаолияти йўлга қўйилиши натижасида чегарани қўриқлаш постидаги ҳарбий хизматчиларнинг фарзандлари тарбияланиши баробарида уларнинг турмуш ўртоқлари ҳам иш билан таъминланди, — дейди туман ҳокими Зоир Алиқулов. 

 

 

Қўшимча қилинишича, ДХХ Чегара қўшинлари хизмат фаолиятининг ўзига хослиги, бўлинмаларнинг аҳоли пунктларидан узоқлиги ва ёпиқ ҳарбий шаҳарчаларда жойлашганини инобатга олиб, Деҳқонобод туманида жойлашган чегарани қўриқлаш взводида ҳарбий хизматчиларнинг фарзандлари тарбияланадиган янги мактабгача таълим ташкилотида болажонлар учун барча қулайликлар яратилган.

 

 

Кенг, шинам хоналар болаларбоп мебел жиҳозлари, ранг-баранг ўйинчоқлар ва кўргазмали қуроллар билан таъминланган. Ҳовлида эса болажонлар учун ёзги ўйин майдони ҳам барпо этилган.