Қирғизистон—Ўзбекистон чегарасидан ID-карта орқали ўтишга рухсат берилиши ҳақида хабар берилган эди. ТИВ матбуот хизмати ушбу тартиб 1 сентябрдан бошлаб йўлга қўйилишини эълон қилди.
Маълум қилинишича, 25 августда Ўзбекистон ҳукумати билан Қирғизистон ҳукумати ўртасида фуқароларнинг ўзаро келиб-кетишлари тўғрисидаги битимга ўзгартиришлар киритиш ҳақида баённома (Бишкек шаҳри, 2023 йил 27 январь) кучга кирди.
Икки давлат ҳудудига кириш, ундан чиқиш, транзит ўтиш, ҳаракатланиш ва унда бўлиб туриш учун ID-картасидан амалда фойдаланиш ўзаро келишувга кўра, 2023 йил 1 сентябрь соат 00:00 дан бошлаб йўлга қўйилади.
Баённома билан киритилган ўзгартиришларга мувофиқ, икки давлат фуқаролари учун давлат чегарасини кесиб ўтишнинг соддалаштирилган ягона тартиби жорий этилди. Жумладан, бундан буён Ўзбекистон ва Қирғизистон фуқаролари 60 кунгача ID-карта билан икки давлат ҳудудларига кириши, ҳаракатланиши ва унда бўлиб туриши мумкин.
Ушбу тартиб, айниқса, Ўзбекистоннинг эксклав ҳудудлари бўлган Сўх, Шоҳимардон, Чўнғара каби ҳудудларидаги фуқаролар учун енгиллик бўлади, уларнинг чегарадан ўтишларидаги ортиқча бюрократияга чек қўяди.
Ўзбекистон фуқаролари хорижга чиқиш биометрик паспорти билан Қирғизистонга кириш, ундан чиқиш ва транзит орқали бошқа давлатларга ўтиши мумкин.
Фуқароларнинг чегарадан кириш-чиқиши ҳақидаги маълумотлар электрон тарзда қайд этилади, паспортга штамп босишга ҳожат қолмайди. Ушбу енгиллик исталган транспорт орқали (самолёт, поезд, автомобиль, автобус ва ҳоказо) чегарани кесиб ўтишда амал қилади.
Изоҳ (0)