“Qor qo‘ynida lola”, “O‘tov”, “To‘qlikka sho‘xlik”, “Odnoklassniki” kabi filmlardagi turfa obrazlari bilan tomoshabinlar mehrini qozongan aktrisa Zamira Beshimova so‘nggi paytlarda ekranlarda ko‘rinmay qoldi. U “Daryo”ga bergan intervyusida ushbu holatni salomatligi bilan bog‘liq muammolar bilan izohladi.
— Inson yoshi ulg‘aygan sari o‘zi uchun nima kerakligini va muhimligini anglar ekan. Hozir men farzandlarimga kerakligimni angladim. Bir muddat ijodga alohida e’tibor berdim, ishtirokimdagi filmlarning keti uzilmadi. Ammo bu sog‘lig‘imga yomon ta’sir etdi. Chunki hamisha menga qiynalgan jabrdiyda ayollarning rolini berishadi. Men rolni ichimdan his qilib ijro etaman. Afsuski, bu yurakka yomon ta’sir qilar ekan. Shu bois biroz tanaffus qilishga, sog‘lig‘imga va farzandlarimga yetarlicha vaqt ajratishga qaror qildim. Ayrimlar o‘ylagandek, ijoddan butunlay uzilganim yo‘q. Yosh iste’dod egalariga saboq beruvchi ijodiy studiyam bor, — deydi aktrisa.
Zamira Beshimova 2021-yili boshiga og‘ir musibat tushgani va ikki kun komada bo‘lgani haqida so‘zlab berdi.
— Bu narsani kasb kasalligi desam ham bo‘ladi, ko‘plab aktyorlarning qon bosimi yoki yuragi bilan bog‘liq muammosi bor. Yaratganning mehribonligini qarangki, o‘sha kuni onam bizning uyga mehmonga keldi. Balki, onamning ko‘ngli sezdimi, o‘sha kuni uyimizda uxlab qoladigan bo‘ldi. Rosti, o‘sha kundagi voqealar qanday sodir bo‘lganini ham bilmayman. Ko‘zimni ochsam, jonlantirish bo‘limida yotibman. Ikki kun komani boshdan kechiribman.
Insultdan keyin o‘zimni butunlay oilamga bag‘ishladim, shunaqa holat bo‘lar ekan, ko‘zingizni yumishga qo‘rqar ekansiz va butunlay hayot to‘xtab qolgandek tuyular ekan. O‘lim haq, u hammaning boshida bor. Biroq inson tayyor bo‘lmas ekan, ertaga o‘laman degan narsa bo‘lmas ekan. Butun hayotingiz ko‘zingiz oldidan o‘tar ekan, farzandlarim ko‘zimning oldidan o‘tdi. Ko‘p narsani, shu narsa haqiqatan ham menga kerakmi, bu yerga borishim, shu ishni qilishim shartmi, deb tahlil qilishni boshladim.
Hozirgi kunda men uchun eng qimmatli boyligim — farzandlarim. Ko‘pincha ota-onalar farzandi bilan aloqani yo‘qotib qo‘yadi. Farzand ko‘chaga chiqib ketadi, ota-ona karyera qilaman deb o‘rtadagi rishta uzilib qoladi. Shu narsani yo‘qotib qo‘ymaslikka harakat qilyapman, — deydi Zamira Beshimova.
Zamira Beshimova insult bo‘lgani farzandlariga yomon ta’sir qilgani va o‘sha paytda nimadan qo‘rqqani haqida gapirdi.
— Ko‘chada yurganimda mashinalar ko‘p joydan o‘tayotgan vaqtim ko‘zimning oldiga ehtiyot bo‘l, seni uyda to‘rtta bolang kutyapti degan narsa keladi. Hozir o‘ylaydigan narsam shu bo‘lib qolgan. Menga nimadir bo‘lsa, bolalarimning ahvoli qanday kechadi deb o‘ylayman. Bilaman, baribir ko‘chada qolib ketishmaydi, qaraydigan, boqadigan odam bo‘ladi, biroq onaning o‘rnini hech kim bosolmaydi. Ertaga ularning boshiga tushadi, nima qiladi degan narsa odamni o‘ylantiradi. Bu tomondan odam o‘zi uchun qo‘rqmas ekan.Ikki kun komada bo‘ldim, hech narsani eslay olmayman. Menga ukol qilishgan, kiyimlarimni almashtirishgan.
Insonning hayoti o‘tib ketadi, xuddi televizorni o‘chirib qo‘ygandek gap ekan. Siz uchun hech narsa o‘zgarmaydi, orqangizdan qoladigan insonlarning hayotini o‘zgartirishi mumkin ekan. Insult bo‘lganimda kichkina farzandim ikki yoshga to‘lmagan edi. Uning ko‘zlarini, bolalarimning atrofimda qanday girdikapalak bo‘lganini ko‘rdim va birinchi navbatda shularga kerak ekanman deb o‘yladim, — deydi aktrisa.
Suhbatni to‘liq holda tomosha qilishingiz mumkin.
Izoh (0)